Parlament Májilisi Iranǵa qatysty qujatty jumysqa aldy
NUR-SULTAN. QazAqparat – Parlament Májilisiniń jalpy otyrysynda palata depýtattary «Qazaqstan men Iran arasyndaǵy azamattyq ister boıynsha ózara quqyqtyq kómek týraly kelisimdi ratıfıkatsııalaý týraly» zań jobasyn jumysqa aldy, dep habarlaıdy QazAqparat.
«Atalǵan kelisim 2019 jylǵy 12 shildede Nur-Sultan qalasynda jasaldy. Kelisimniń negizgi maqsaty – ýaǵdalasýshy taraptardyń azamattyq ister boıynsha quqyqtyq kómek kórsetý tártibin belgileý», - dedi Májilistiń Zańnama jáne sot-quqyqtyq reforma komıteti tóraǵasy Nurlan Ábdirov.
Bul turǵyda qujattardy berý, dáleldemelerdi jınaý, kýáger men sarapshyny shaqyrý, sot aktilerin jáne tórelik sheshimderdi taný, sondaı-aq aqparatpen, materıalmen almasý eskerilgen.
«Komıtet atalǵan zań jobasyn jumysqa alýǵa jáne ol boıynsha 2021 jylǵy 24 qarashaǵa deıin qorytyndy ázirleýge daıyn», - dedi N. Ábdirov.
