Parlament Májilisi halyq pen Prezıdent kórsetip otyrǵan joǵary senimdi aqtaıdy - B. Іzmuhambetov
ASTANA. QazAqparat - QR Parlamenti Májilisiniń jańadan saılanǵan Tóraǵasy Baqtyqoja Іzmuhambetov halyqtyń kókeıkesti problemalaryn sheshýge barynsha járdemdesetinin atap ótti.
«Men muny ózime kórsetilgen úlken senim dep jáne men úshin úlken jaýapkershilik dep túsinemin. Ótken saılaý bizdiń birligimiz ben toptasqanymyzdy kórsetti. Qazaqstandyqtar Elbasynyń elimizdi damytý aıasynda usynǵan strategııalyq baǵyttyń durystyǵyn túsindi, sondaı-aq senedi. Saılashylardyń belsendiligi de osynyń aıǵaǵy. Búginde Qazaqstanda kóp partııaly Parlament dástúri qalyptasqanyn senimmen aıta alamyz. Ekinshi saılaý qatarynan úsh partııa halyqtyń senimine ıe bolyp otyr. Májiliske Qazaqstan halqy Assambleıasy arqyly ártúrli etnos ókilderi endi. Parlamenttiń pikiralýandyǵy berik ornyǵyp kele jatqanyn bizdiń elimizdegi demokratııanyń belgisi dep bilýimiz kerek»,- dedi Májilis Tóraǵasy jalpy otyrysta.
Sonymen qatar ol bıyl Qazaqstan úshin asa eleýli jyl ekenin aıta kele, «Biz el Táýelsizdiginiń jıyrma bes jyldyǵyn toılaǵaly otyrmyz. Osy ýaqyt ishinde elimizde eleýli úlken ister júzege asty, sonymen qatar áli de jasaıtyn qyzmetter kóp. Memleket basshysy atap ótkendeı, biz halyqtyń kókeıkesti problemalaryn anyqtap, olardy sheshýge barynsha járdemdesýimiz kerek»,-dedi.
Sóz sońynda Baqtyqoja Іzmuhambetov altynshy saılanǵan Parlament Májilisi halyq pen Prezıdent kórsetip otyrǵan joǵary senimdi aqtaıtynyna senimdi ekenin atap ótti.
