Parlament Májilisi áleýmettik qoldaýdy kúsheıtýge arnalǵan qujatty maquldady
ASTANA. QazAqparat - Parlament Májilisiniń jalpy otyrysynda «2019-2021 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» zań jobasy maquldandy, dep habarlaıdy QazAqparat tilshisi.
Zań jobasy Elbasynyń «Nur Otan» partııasynyń on segizinshi sezinde bergen tapsyrmalaryn oryndaý úshin daıyndaldy. Ol Qazaqstandy damytýǵa, halyqtyń ómirin jaqsartýǵa arnalǵan mańyzdy sharalardy qarjylandyrýǵa baǵyttalǵan.
«Respýblıkalyq bıýdjet túsimderiniń naqtylanǵan boljamy 821 mlrd teńgege ulǵaıýymen 10 trln 569 mlrd teńgeni quraıdy. Bul túsimder mynalardyń esebinen júrgiziledi: kedendik ákimshilendirýdi kúsheıtý nátıjesinde 200 mlrd teńge somasynda qosymsha kirister; Ulttyq qordan kepildendirilgen transfertti 250 mlrd teńgege ulǵaıtý; tikeleı ınvestıtsııalar qoryn qurýǵa Ulttyq qordan 370 mlrd teńge somasynda nysanaly transfert tartý nátıjesinde iske asyrylady», - dedi QR Premer-Mınıstriniń birinshi orynbasary - Qarjy mınıstri Álıhan Smaıylov.
Onyń sózine qaraǵanda, 2019 jyly respýblıkalyq bıýdjettiń shyǵystary 1 trln 168 mlrd teńgege ulǵaıa otyryp, naqtylaýdyń nátıjesinde 11 trln 895 mlrd teńgeni quramaq. Bıýdjetti naqtylaýdyń negizgi baǵyty «Áleýmettik qamqorlyq» jańa áleýmettik sharalardy iske asyrýǵa arnalǵan, olarǵa aǵymdaǵy jyly tıisti is-sharalar boıynsha 444,3 mlrd teńge bólinedi.
Osy oraıda 2019 jylǵa arnalǵan 224,3 mlrd teńge shyǵystary bar azamattardyń jekelegen sanattaryn áleýmettik qoldaýdy kúsheıtýge negizdelgen. Qarajat ataýly áleýmettik kómek tólemderin ulǵaıtýǵa, múgedek balany tárbıelep otyrǵan ata-analarǵa, qamqorshylarǵa járdemaqy, sondaı-aq bala jasynan birinshi toptaǵy múgedekke kútim jasaý jónindegi járdemaqylar mólsherin ulǵaıtýǵa jáne bıýdjet salasynyń aqysy tómen qyzmetkerleriniń jalaqysyn arttyrýǵa baǵyttalatyn bolady.
«Qarjy jaǵynan qamtamasyz etilýi naqtylanǵan bıýdjet jobasynda kórinis tapqan is-sharalardyń kelesi mańyzdy blogy - bul «Jastar jyly». Osy baǵyt boıynsha qosymsha respýblıkalyq bıýdjetten 24,6 mlrd teńge bólinetin bolady», - dedi Á. Smaıylov.
Kelesi mańyzdy baǵyt - ol «Qazaqstan ınvestıtsııalyq damý qory» tikeleı ınvestıtsııalar qoryn qurý. Qor shıkizattyq emes sektorda sheteldik ınvestorlarmen birlesip ınvestıtsııalaý negizinde iri serpindi jobalardy iske asyrý úshin qurylady.
«Bıýdjetti naqtylaý aıasynda buryn aıtylǵan bastamalardy iske asyrý jalǵastyrylatyn bolady. Máselen, Túrkistan oblysy men Astana qalasyn damytýdyń keshendi josparlaryn iske asyrýǵa qosymsha túrde tıisinshe 42,3 mlrd teńge jáne 21,8 mlrd teńge baǵyttaý usynylady. Osy qarajatty, sondaı-aq óńirlik ınfraqurylymdy damytý jónindegi joǵaryda atalǵan bastamalardy eskere otyryp, aǵymdaǵy jyly Túrkistan oblysynyń nysanaly transfertteriniń jalpy kólemi 60 mlrd teńge, Astana qalasyna 140 mlrd teńgeni qurady. Aǵymdaǵy jyly óńirlerge nysanaly transfertterdiń jalpy kólemi 1 trln 562,7 mlrd teńgeni nemese shyǵystardyń jalpy kóleminiń 13,1 paıyzyn, al sýbventsııalardy esepke alǵanda 26,5 paıyzdy quraıdy», - dedi ol.
