Parlament Qylmystyq-protsestik kodeksin qabyldady
ASTANA. QazAqparat - Búgin Parlament Májilisiniń jalpy otyrysynda palata depýtattary Qylmystyq-protsestik kodeks jobasyna Senat engizgen ózgeristerdi talqylap, joǵary palata depýtattary usynǵan túzetýlerge kelisimin berdi. Osylaısha, Parlament qabyldaǵan zań Memleket basshysynyń qol qoıýyna joldanatyn bolady.
Budan buryn da habarlaǵanymyzdaı, kodeks jobasy qylmystardy tergeý protsesin ońaılatý men jedeldetýge baǵyttalady. Bul rette qylmystyq protseske tartylǵan tulǵalardyń konstıtýtsııalyq quqyqtaryn qorǵaýdyń joǵary deńgeıin qamtamasyz etýge, sot tóreligin iske asyrýdyń tıimdiligin arttyrý maqsatynda qylmystyq sot isin júrgizýdi jetildirý kózdeledi. Atap aıtqanda, qylmystyq qýdalaýdy bastaý rásimin ońaılatý maqsatynda qylmystyq is qozǵaý jáne tergeýge deıingi tekseris júrgizý satysy alynyp tastalady. Tergeý jáne anyqtaý organdary azamattardyń konstıtýtsııalyq quqyqtaryn qozǵaıtyn protsestik áreketterdi derbes qabyldaý jónindegi ókilettikteri tarylady. Kerisinshe, qorǵaýshynyń sotqa deıingi is júrgizýden bastap qatysýynyń quqyqtyq negizderi keńeıtiledi.
Budan bólek, Kodekste qylmystyq protseske tergeý sýdıasy men protsess prokýrory sekildi fıgýralar engiziledi. Bul rette adamnyń konstıtýtsııalyq quqyqtary men bostandyqtaryn qozǵaıtyn barlyq tergeý áreketteri tergeý sýdıasy men protsess prokýrorynyń sanktsııasymen ǵana júrgiziletin bolady. Sonymen qatar, qylmystyq protseske kelisim ınstıtýty engiziletin bolady. Ol kináni moıyndaý týraly mámileni, yntymaqtastyq týraly kelisimdi júrgizedi. Bul rette mámile nysany onsha aýyr emes, aýyrlyǵy ortasha ne aýyr qylmystar boıynsha kúdikti nemese aıyptalýshy keltirilgen aıyptaýlarmen kelisken jaǵdaıda júzege assa, yntymaqtastyq kelisimi barlyq sanattaǵy qylmystar boıynsha qylmystardy ashýǵa jáne tergeýge kómektesken kezinde júrgiziledi.
Al senatorlar engizgen ózgertýlerge keletin bolsaq, olardyń basym bóligi redaktsııalyq naqtylaý sıpatynda bolyp tabylady.
«Senat engizgen ózgerister negizinen Elbasynyń sońǵy ýaqyttaǵy Jarlyǵyna sáıkes bolyp tabylady. Atap aıtqanda, Qazaqstan Respýblıkasy Prezıdentiniń Kúzet qyzmeti men Qazaqstan Respýblıkasynyń Respýblıkalyq ulany qosý jolymen memlekettik organ retinde Qazaqstan Respýblıkasy Memlekettik kúzet qyzmeti bolyp qaıta uıymdastyrylǵan bolatyn. Ózgerister osyǵan qatysty bolyp tabylady», - dedi zań jobasy boıynsha baıandaǵan Májilis depýtaty Ramazan Sárpekov.
