Parlament Qylmystyq-atqarý júıesin Іshki ister mınıstrligine beretin zańdy qabyldady
ASTANA. 28 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine qylmystyq-atqarý júıesi máseleleri boıynsha ózgerister men tolyqtyrýlar engizý týraly» QR zańyn qabyldady.
Atalǵan zań QR Prezıdentiniń «Qazaqstan Respýblıkasynyń penıtentsıarlyq júıesi týraly» Jarlyǵyn oryndaý maqsatynda ázirlengen. Bul rette qujat arqyly 16 zańnamalyq aktilerge ózgerister men tolyqtyrýlar engizý kózdeledi. Túzetýler QR Ádilet mınıstrliginiń qylmystyq-atqarý qyzmeti salasyndaǵy, onyń ishinde qylmystar jasady dep kúdik keltirilgen jáne aıyptalýshy adamdardy ustaý, jazasyn tergeý ızolıatorynda ótep jatqan sottalǵandarǵa qatysty qylmystyq jazalardy atqarý jónindegi fýnktsııalary men ókilettikterin Іshki ister mınıstrligine berýge baǵyttalǵan.
«Qylmystyq-atqarý júıesi organdary ishki ister organdarynyń júıesine enýine baılanysty olar ózindik quqyq qorǵaý organdarynyń anyqtaý jáne jedel izdestirý qyzmeti sýbektileri tizbesinen alynyp tastalady. Budan bólek, qylmystyq-atqarý júıesi Іshki ister mınıstrliginiń qaramaǵynda bolǵanyna baılanysty ózindik qurylymyn saqtap qalady jáne onyń qyzmetinde úılestirýshilik jáne vedomstvolyq baqylaýdy mınıstrlik júzege asyratyn bolady. Osy júıeniń qyzmetkerleri ózderiniń jeńildikterin, eńbek jyldaryn jáne ataqtaryn saqtap qalady», - deıdi qujat boıynsha baıandaǵan Іshki ister vıtse-mınıstri Amantaı Kúreńbekov.
Onyń aıtýynsha, kámeletke tolǵandardyń jaza óteýine arnalǵan mekemelerdi baqylaý ishki ister áskerine beriledi.
Parlament qabyldaǵan zań Memleket basshysynyń qol qoıýyna jiberiledi.
