Parlament kvazımemlekettik sektordyń satyp alýynyń ashyqtyǵyna qatysty zańdy qabyldady
NUR-SULTAN. QazAqparat – Parlament Senatynyń jalpy otyrysynda palata depýtattary «Kvazımemlekettik sektordyń jekelegen sýbektileriniń satyp alýy týraly» Zańy men ilespe qujatty qabyldady, dep habarlaıdy QazAqparat tilshisi.
«Qazirgi ýaqytta kvazımemlekettik sektordyń satyp alýlary ártúrli normatıvtik quqyqtyq aktilermen rettelip keledi. Máselen, «Samuryq-Qazyna» qorynyń satyp alýlary «Ulttyq ál-aýqat qory týraly» Zańmen jáne Qordyń dırektorlar keńesi bekitken satyp alý qaǵıdalarymen retteledi.
«Samuryq-Qazyna» qorynyń quramyna kirmeıtin «Báıterek», «Zerde» sııaqty ulttyq kompanııalardyń satyp alýlary «Memlekettik múlik týraly» Zańmen jáne Qarjy mınıstrligi bekitken Satyp alý qaǵıdalarymen retteledi. Ortalyq jáne jergilikti atqarýshy organdardyń janynda jumys isteıtin kvazımemlekettik sektor sýbektileriniń satyp alýlary «Memlekettik satyp alý týraly» Zańmen jáne Memlekettik satyp alýdy júzege asyrý qaǵıdalarymen retteledi», - dedi QR Qarjy mınıstri Erulan Jamaýbaev.
Onyń aıtýynsha, tegin medıtsınalyq kómektiń kepildik berilgen kólemi esebinen dárilik zattardy satyp alatyn medıtsınalyq uıymdardyń jáne Biryńǵaı dıstrıbıýter SQ-Farmatsııanyń satyp alýlary Densaýlyq týraly Kodekspen jáne Dárilik zattardy satyp alý qaǵıdalarymen retteledi.
«Ázirlengen zań jobasymen Samuryq-Qazyna Qorynyń jáne ózge de ulttyq holdıngter men ulttyq kompanııalardyń satyp alýlaryn retteý usynylady. Osylaısha, zań jobasy satyp alýlary shamamen 3,4 trln teńge somasyndaǵy 250-den asa ulttyq kompanııany olardyń enshiles uıymdarymen birge qamtıtyn bolady. Bul rette ortalyq jáne jergilikti atqarýshy organdardyń janyndaǵy memlekettik kásiporyndardyń, aktsıonerlik qoǵamdar, jaýapkershiligi shekteýli seriktestikterdiń satyp alýlaryn «Memlekettik satyp alý týraly» Zańnyń aıasynda qaldyrý usynylady», - dedi mınıstr.
Zań jobasynda mynadaı negizgi tásilder kózdeledi:
Birinshiden, kvazımemlekettik sektor sýbektileri úshin biryńǵaı bolyp sanalatyn, Zańnyń qoldaný aıasyna, qaǵıdattarǵa, shekteýlerge, tásilderge, baqylaýǵa jáne shaǵymdanýǵa qatysty bazalyq erejeler Zań deńgeıinde bekitiledi. Memlekettik satyp alýǵa uqsas tenderlik qujattamany aldyn ala talqylaý, sondaı-aq shaǵymdaný kezeńinde kelisimshart jasasýdy toqtata turý mehanızmderi usynylady.
Ekinshiden, satyp alý protsesin naqtylaıtyn normalardy erejeler deńgeıinde reglamentteý kózdelip otyr. Osy jerde «Samuryq-Qazyna» qorynyń Satyp alý erejelerin bekitýdi ýákiletti organnyń (Qarjymıni) kelisimi boıynsha Qordyń qaramaǵynda qaldyrý usynylady. Bul Qor qyzmetiniń ereksheligi men onyń mártebesine, sondaı-aq ІRO ótkizý jáne jekeshelendirýdiń ózge de túrleri kezinde Qor kompanııalarynyń ınvestıtsııalyq tartymdylyǵyn saqtaý qajettigine baılanysty.
Mınıstrdiń aıtýynsha, negizgi zań jobasy 19 baptan turady. Jalpy, qujatty qabyldaý – kvazımemlekettik sektor sýbektileriniń satyp alýynyń ashyqtyǵyn, tıimdiligin arttyrýǵa jáne osy saladaǵy sybaılas jemqorlyq táýekelderin tómendetýge múmkindik beredi.
Sonymen qatar, senatorlar búgin «Qazaqstan Respýblıkasynyń keıbir zańnamalyq aktilerine kvazımemlekettik sektordyń jekelegen sýbektileriniń satyp alýy máseleleri boıynsha ózgerister men tolyqtyrýlar engizý týraly» ilespe qujatty eki oqylymda talqylap, qabyldady.
