Parlament quramyndaǵy partııalar membaǵdarlamalardyń oryndalýyna qatysty jaýapkershilikti moıyndaryna ala bilýleri shart - Eńlik Nurǵalıeva
Búgin tilshilerge bergen suxbatynda «Eýrazııalyq quqyq qorǵaý ortalyǵy» qoǵamdyq qorynyń prezıdenti Eńlik Nurǵalıeva osyndaı pikir bildirdi.
"Men Parlamenttiń bastamasyn qoldaımyn. Oǵan birqatar sebepter bar. Birinshiden, bul xalyqaralyq axýal. Qazir jahandyq ekonomıkalyq daǵdarystyń órship turǵanyn bárimiz kórip otyrmyz. Sonyń saldarynan álemdik geosaıası jaǵdaı da órship barady. Qazaqstan álemde jer kólemi boıynsha, 9-orynda, geosaıası orny óte úlken. Syrtqy kúshterden biz ózimizdi qaýipsizdikte ustaýymyz kerek. Ol úshin saılaýdy merziminen buryn ótkizgenimiz durys. Qazirgi bizdiń basty maqsatymyz - legıtımdi jańa parlament quramyn jasaqtaý. Ol jańa kúshpen, Prezıdenttiń 5 ınstıtýtsıonaldy reformalaryn jáne "100 naqty qadamyn" oryndaýǵa daıyn jańa azamattarmen, jańa depýtattarmen óz jumysyn bastaıdy. Búgingi Parlament 80 zańnamalyq aktini, Ult Josparyna qatysty 59 zańdy qabyldady jáne óziniń tarıxı mıssııasyn oryndady dep esepteımin. Olar óte qıyn rejimde jumys jasady. Sol úshin májilismenderge úlken alǵys aıtýlarymyz kerek", - dedi ol.
Onyń oıynsha, partııa ókilderi qatarynda Parlamentke Qazaqstan xalqynyń birligin, memlekettik baǵdarlamalardyń damýyn qamtamasyz etetin azamattar kelýi kerek.
"Májiliste bizde 3 fraktsııa ókilderi bolǵanyn bilemiz. Bolashaqta eger saılaý týraly sheshim shyǵyp jatsa, parlamentke taǵy qandaı partııalar enýi kerektigin xalyq sheshetin bolady. Májiliste partııalar kóp bolǵan saıyn, qazaq xalqynyń múddesine de soǵurlym kóp kepildik beriledi. Sebebi partııaǵa xalyq múshelik etedi. Sondyqtan másele partııanyń sanynda emes, partııa atynan keletin azamattardyń sapasynda. Sebebi Qazaqstan xalqynyń birligin, memlekettik baǵdarlamalardyń damýyn qamtamasyz etetin solar bolady. Al eger biz saılaýdy jyl sońyna deıin sozatyn bolsaq, bir jyl ýaqytty tekten tekke jiberip alamyz. Parlament Májilisi men jergilikti máslıxat depýtattaryn saılaýdy bir ýaqytta ótkizsek, bıýdjettik qarajatty únemdeýge de bolady", - dep túıdi sózin E. Nurǵalıeva.
