Parlament QR men Ázerbaıjannyń salyq týraly konventsııasyna engiziletin ózgeristerdi ratıfıkatsııalady
Senat depýtattary aldynda zań jobasy týraly sóz sóılegen qarjy mınıstri Baqyt Sultanovtyń aıtýynsha, atalǵan qujat aqparat almasýdy keńeıtý jolymen eki memlekettiń salyq qyzmetteriniń yntymaqtastyǵyn damytýǵa múmkindik beredi.
«Ekinshiden, salyqtan jaltarýlar men konventsııa erejelerin teris paıdalanýlar bolǵan kezde ishki zańnamany qoldanýǵa jol ashady. Sondaı-aq, Hattamada «Qazaqstan» jáne «Ázerbaıjan» (QR SІM usynǵan redaktsııaǵa sáıkes) termınderine ózgerister engizildi, salyqtardyń ataýlary jańartyldy (salyqtardyń eskirgen ataýlary eki memlekettiń de qoldanystaǵy salyq zańnamalaryna sáıkes zamanaýı ataýlarǵa ózgertildi), ýaǵdalasýshy memleketterdegi rezıdenttikti anyqtaýdy retteıtin baptyń erejeleri naqtylanyp, basqa da ózgerister engizildi», - dedi mınıstr.
Baqyt Sultanov óz sózinde eki memleket arasynda salyq salý máselelerinde zańnamalyq baza retinde osy Hattamanyń róli mańyzdy ekenin atap ótti.
«Budan basqa Ázerbaıjanmen ózara saýda-sattyq týraly statıstıkalyq derekterge toqtalyp ótken jón. Sońǵy 10 jylda Qazaqstan men Ázerbaıjan arasyndaǵy taýar aınalymy 3,2 mlrd AQSh dollaryn qurady. Qazaqstandyq eksporttyń negizgi baptary bıdaı, bıtým tektes túrlerinen alynǵan shıki munaı ónimderi jáne temirden jasalatyn tegis ılem bolyp tabylady», - deıdi ol.
Mınıstr sonymen birge sońǵy 10 jylda Ázerbaıjannan Qazaqstan Respýblıkasyna ınvestıtsııa 168,7 mln AQSh dollaryn quraǵanyn jetkizdi.
«Hattamany iske asyrý memlekettik bıýdjetten qarjylyq shyǵyndardy talap etpeıdi», - dep túıdi mınıstr.
