Parlament kóshi-qon týraly zańdy qabyldady
ASTANA. KAZINFORM – Májilistiń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne qylmystyq-atqarý júıesi salalaryndaǵy zańnamany jetildirý máseleleri boıynsha ózgerister men tolyqtyrýlar engizý týraly» zańyna Senattyń jańa redaktsııada usynǵan jekelegen baptarymen kelisti.
«Zańnama jáne sot-quqyqtyq reforma komıteti atalǵan zańnyń jekelegen baptaryna Senat engizgen ózgerister men tolyqtyrýlardy qarap shyǵyp kelesini atap ótedi.
Penıtentsıarlyq júıe mekemelerinde beınebaqylaý júıelerin qasaqana joıǵany nemese búldirgeni úshin qylmystyq jaýaptylyqtyń engizilýine baılanysty Senat depýtattary osy norma qoldanylatyn qylmystyq-atqarý júıesi mekemelerin tergeý ızolıatorlarymen jáne ýaqytsha ustaý ızolıatorlarymen tolyqtyrýdy usyndy.
Sonymen qatar, Senat depýtattary jazanyń balamaly túrlerin boldyrmaıtyn túzetýler men naqtylaý sıpatyndaǵy túzetýler usyndy. Atalǵan ózgerister men tolyqtyrýlar Májilisi qabyldaǵan zańnyń tujyrymdamasyn ózgertpeıdi.
Osyǵan baılanysty «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne qylmystyq-atqarý júıesi salalaryndaǵy zańnamany jetildirý máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jekelegen baptaryna Qazaqstan Respýblıkasy Parlamentiniń Senaty engizgen ózgerister men tolyqtyrýlarmen kelisýdi usynamyz. Qoldaýlaryńyzdy suraımyz», - dedi depýtat.
Osylaısha Májilis depýtattary Senattyń jańa redaktsııada usynǵan jekelegen baptarymen kelisti.
Aıta keteıik, ótken aptada Senat halyqtyń kóshi-qonyna qatysty zańdy Májiliske qaıtarǵan bolatyn.
«Sonymen qatar, osy zańmen, aýyr nemese asa aýyr qylmystar jasaǵan sheteldikterdiń Qazaqstan Respýblıkasyna kelýine tyıym salatyn negizder keńeıtilip otyr. Osyǵan baılanysty qylmystyq-protsestik kodekstiń normalaryna sáıkes keltirý maqsatynda, «Sheteldikterdiń quqyqtyq jaǵdaıy týraly» jáne «Halyqtyń kóshi-qony týraly» QR zańdaryna tıisti tolyqtyrýlar engizildi», - degen edi senator Sovetbek Medebaev.
