Parlament qos azamattyqpen kúreske baǵyttalǵan qujatty qabyldady
NUR-SULTAN. QazAqparat – Parlament Senatynyń jalpy otyrysynda Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.
Kelisimge 2019 jyly 27 qarashada Bishkek qalasynda qol qoıyldy.
Bul qujat azamattyq týraly aqparat almasýǵa, zańsyz kóshi-qonmen kúresýge múmkindik beredi.
«Naqty aıtsaq, statıstıka men aqparat almasýǵa múmkindik bar. Azamattar týraly jeke aqparat alýǵa bolady. Eki el úkimetteri tájirıbe almasyp, bir-birine praktıkalyq kómek kórsetedi. Kóshi-qon salasyndaǵy qylmystarmen kúresip, zańsyz kanaldardy joıýǵa múmkindik bar. Qyrǵyzstan Parlamenti kelisimdi 2021 jylǵy 17 aqpanda bekitti», - dedi QR Іshki ister mınıstri Erlan Turǵymbaev.
Onyń aıtýynsha, ótken jyly Qazaqstanǵa Qyrǵyzstannan 281 myńnan astam azamat keldi, osy jyly 3 aıda 32 myńnan asty.
«Al Qazaqstannan byltyr 175 myń azamat Qyrǵyzstanǵa barǵan. Osy jyly 3 aıda 36 myńnan asty. Qazaqstan osyndaı kelisimdi Ózbekstan, Tájikstan, Ázerbaıjan jáne Belarýs memleketimen jasady. Osy Zań azamattyq týraly aqparat almasýǵa, zańsyz kóshi-qondy retteýge, qos azamattyqpen kúresýge baǵyttalǵan. Áleýmettik-ekonomıkalyq jáne quqyqtyq teris saldarǵa ákep soqpaıdy, sondaı-aq qosymsha qarajat talap etpeıdi», - dedi mınıstr.
