Parlament kópbalaly otbasylar men jastardyń baspana máselesin sheshetin zań qabyldady
Atap aıtqanda, zań jobasy bir top Parlament depýtattarynyń bastamashylyǵymen ázirlendi. Bul turǵyda «Turǵyn úı qatynastary týraly», «Memlekettik jastar saıasaty týraly», «QR Memlekettik nagradalar týraly» zańdaryna túzetýler eskerilgen. Usynylyp otyrǵan túzetýlerdiń negizgilerine toqtalsaq, kópbalaly otbasy uǵymyn «Neke (erli-zaıyptylyq) jáne otbasy týraly» kodeksine sáıkes keltirý eskerilgen. Bul zańnamalyq aktiler arasyndaǵy qaıshylyqty joıady.
«Ekinshiden, «satyp alý quqynsyz jalǵa beriletin turǵynjaı» uǵymyn engizilmek. Bul tabysy tómen halyqtyń áleýmettik osal toptaryna arnalǵan. Satyp alý quqyǵynsyz jalǵa beriletin turǵyn úıdiń turaqty kommýnaldyq qoryn qurýǵa mumkindik beredi», - dedi Májilis depýtaty Shavhat Ótemisov zań jobasy boıynsha baıandama jasaı otyryp.
Úshinshiden, «Altyn alqa», «Kúmis alqa» alǵandar nemese buryn «Batyr ana», sondaı-aq І jáne ІІ dárejeli «Ana dańqy» ataǵyn alǵan kópbalaly analar men kópbalaly otbasylar sanaty úshin turǵyn úı alýǵa jeke kezektilik engizý qarastyrylǵan. Kópbalaly otbasylarǵa turǵyn úıdi birinshi kezekte alý quqyǵynyń berilgeni - osy zań jobasynyń mańyzdy ózgeristeriniń biri bolyp sanalady. Osy sanatqa jatatyn úı alýǵa úmitkerlerdi baspana alǵanǵa deıin kezekten shyǵarýǵa bolmaıdy.
«Qazirgi ýaqytta kezekte turǵan kópbalaly otbasylardyń sany 31 725-ke jetti. Kópbalaly otbasylardy jalǵa beriletin turǵyn úımen qamtamasyz etý maqsatynda «Nurly jer» baǵdarlamasy boıynsha jyl saıyn 50 mlrd teńge qarajat bólinetin bolady. Osynyń arqasynda jylyna keminde 6 myń páter tapsyrylady», - dedi depýtat.
Munymen qosa, memlekettik jastar saıasatynyń negizgi baǵyttaryna jumys isteıtin jastar úshin qoljetimdi baspana júıesin damytýdy engizý qarastyrylǵan. Sondaı-aq, memlekettik jastar saıasaty jónindegi ýákiletti organdy satyp alý quqyǵynsyz jalǵa beriletin turǵyn úıdi berý qaǵıdalaryn bekitý quzyretimen qamtamasyz etý máselesi qarastyrylǵan.
«Bul túzetýler Elbasynyń tapsyrmasy boıynsha jumys isteıtin jastardy jalǵa beriletin turǵyn úımen qamatamasyz etýge múmkindik beredi. «Nurly jer» baǵdarlamasynyń aıasynda 2019-2025 jyldary Nur-Sultan, Almaty jáne Shymkent qalalarynda jumys isteıtin jastar úshin jyl saıyn keminde 1 myń jalǵa beriletin turǵyn úı salý josparlanýda. Jumys isteıtin jastar úshin bul jaqsy múmkindik. Qaralyp otyrǵan zań jobasynyń qabyldanýy kópbalaly otbasylardyń jáne jumys isteıtin jastardyń baspana máselesin jedel sheshý úshin zańnamalyq negizdi qalyptastyrady», - dedi Shavhat Ótemisov.
