Parlament kelesi AES-ti salýǵa qatysty konstrýktıvti usynystar ázirleıdi — Qoshanov

ASTANA. KAZINFORM — Májilistiń Qoǵamdyq qabyldaý qyzmeti aıasynda meılinshe tyǵyz qarym-qatynas ornatyp, azamattardyń ótinishterine aıryqsha kóńil bólgen jón.

Bul týraly Májilis tóraǵasy Erlan Qoshanov málim etti.

— Atom elektr stantsııasyn salatyn jerdi anyqtaý jaıyna keler bolsaq, Memleket basshysy osy másele boıynsha da depýtattyq korpýstan usynys kútýde. Biz bul taqyrypty jaqsy bilemiz. Elimizde beıbit atomdy paıdalaný qajettigin aıtyp, kezinde halyqqa túsindirý jumystaryn belsendi túrde júrgizdik. Endi kezekti atom elektr stansasyn salatyn oryndy anyqtaý taqyrybyn salalyq komıtet pen Qoǵamdyq palata otyrystarynda sarapshylar men ǵalymdardyń qatysýymen talqylaǵan jón bolady. Sonyń qorytyndysy boıynsha konstrýktıvti usynystar ázirleıtin bolamyz, — dedi E. Qoshanov Májilistiń jalpy otyrysynda.

Onyń aıtýynsha, zańnamalyq sheshimderdiń bári halyqpen tyǵyz baılanysta qabyldanýǵa tıis.

— Óz qyzmetimizde «halyq únine qulaq asatyn memleket» tujyrymdamasyn basshylyqqa alyp, saılaýshylarmen belsendi qarym-qatynas jasaýymyz qajet. Májilistiń Qoǵamdyq qabyldaý qyzmeti aıasynda meılinshe tyǵyz qarym-qatynas ornatyp, azamattardyń ótinishterine aıryqsha kóńil bólgen jón. Halyqtyń pikiri, azamattardyń erik-qalaýy — Memleket basshysynyń saıasatynyń basty ózegi. Sondyqtan depýtattar kúndelikti jumysta osy qaǵıdany ustanýymyz kerek, — dedi Májilis tóraǵasy.

Eske salsaq, 28 qańtarda Prezıdent Qasym-Jomart Toqaevtyń qatysýymen Úkimettiń keńeıtilgen otyrysy ótti.

Memleket basshysy óz sózinde Úkimet pen Parlament ekinshi ıadrolyq stantsııasy qaı aımaqta salý qajet ekeni jóninde usynys berýi kerek ekeninin atap ótti.

Atap aıtqanda, ekinshi AES salýǵa qaıtadan referendým ótkizilmeıdi.