Parlament kedendik retteý men salyq salý máselesine arnalǵan zańdy qabyldady
ANA. Maýsymnyń 10-y. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine kedendik retteý jáne salyq salý máseleleri boıynsha ózgerister men tolyqtyrýlar engizý týraly» zań jobasyn eki oqylymda talqylap, qujatty qabyldady.
Endi atalǵan zań Memleket basshysynyń qol qoıýyna jiberiledi.
Qujat elimizdiń qoldanystaǵy zańnamalyq aktilerin «QR keden isi týraly» Kodekstiń ázirlengen jobasynyń erejelerine sáıkes keltirý maqsatynda qabyldanyp otyr. Máselen, bul rette Ákimshilik quqyq buzýshylyq týraly kodekste qoldanystaǵy baptar jańa redaktsııada jazylady. Sonymen birge, zań boıynsha keden isi salasyndaǵy etıl spırti men alkogol ónimin óndirý jáne olardyń aınalymy salasyndaǵy, munaı ónimderiniń jekelegen túrleri men temeki ónimderin memlekettik retteý salasyndaǵy buzýshylyqtar úshin ákimshilik jaýapkershilikti kózdeıtin jańa baptar engiziledi. Sondaı-aq, jaýapkershilikti júkteıtin mundaı baptar keden odaǵynda taýarlardyń eksporty men ımporty, jumystardy oryndaý, qyzmetter kórsetý kezinde tóleýshilerdiń salyq zańnamasynda belgilengen mindetterdi oryndamaǵany úshin de qarastyrylatyn bolady.
Al Salyq kodeksi QR Úkimeti aıqyndaıtyn tizbe boıynsha keden odaǵyna múshe memleketter aýmaǵynan elimizdiń aýmaǵyna ımporttalǵan taýarlar boıynsha esepke jatqyzý ádisimen qosylǵan qun salyǵyn tóleý tártibin reglamentteıtin jańa bappen tolyqtyrylǵan.
