Parlament Keden odaǵynyń aýmaǵyndaǵy tehnıkalyq retteýdiń biryńǵaı qaǵıdattary týraly kelisimdi qabyldady
ASTANA. 2 maýsym. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Belarýs Respýblıkasyndaǵy, Qazaqstan Resppýblıkasyndaǵy jáne Reseı Federatsııasyndaǵy tehnıkalyq retteýdiń biryńǵaı qaǵıdattary men qaǵıdalary týraly kelisimdi ratıfıkatsııalaý týraly» QR Zańy qabyldandy.
Biryńǵaı ekonomıkalyq keńistikke qatysatyn 3 memleket arasyndaǵy tehnıkalyq retteýdiń biryńǵaı qaǵıdattary týraly kelisimge Sankt-Peterbor qalasynda 2010 jyly 18 qarashada qol qoıyldy. Kelisimniń maqsaty Keden odaǵynyń tehnıkalyq reglamentterine sáıkes Biryńǵaı ekonomıkalyq keńistik aýmaǵynda ónimniń erkin aınalymy úshin tehnıkalyq retteýdiń biryńǵaı quqyqtyq negizderin jasaý bolyp tabylady.
Sondaı-aq, kelisimde BEK-tiń kedendik aýmaǵyna úshinshi elderden ónimniń kelip túsýiniń biryńǵaı rejımin belgileýdiń negizderi qalanǵan. Qujatta aıqyndalǵan qaǵıdattar saýdadaǵy tehnıkalyq kedergiler men Dúnıejúzilik saýda uıymynyń sanıtarııalyq jáne fıtosanıtarııalyq sharalary jónindegi qujattarmen aıqyndalǵan talaptarǵa negizdeledi. Bul qaǵıdattar keıinnen BEK-tiń halyqaralyq qoǵamdastyqpen josparly túrde yqpaldasýyna múmkindik beredi.
Qujat Memleket basshysynyń qol qoıýyna jiberiledi.
