Parlament Qazaqstandaǵy keden isi týraly kodeksti qabyldady
aýsymnyń 10-y. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasyndaǵy keden isi týraly» kodeks jobasyn eki oqylymda talqylap, qujatty qabyldady.
Keden odaǵynyń keden kodeksinde odaqqa múshe memleketterdiń ulttyq keden zańnamasyna 182 silteme normalar kózdeledi. Osyǵan oraı, «Kazaqstan Respýblıkasyndaǵy keden isi týraly» kodeks jobasy atalǵan silteme normalardy egjeı-tegjeıli naqtylaýdy, sondaı-aq keden odaǵynyń kedendik aýmaǵy arqyly ótkiziletin taýarlardyń kedendik qunyn aıqyndaý týraly kelisimniń tıisti erejelerin qosýdy eskere otyryp, keden odaǵynyń keden zańnamasynyń normalaryn qaıtalaý jolymen ázirlenip otyr.
Osylaısha, atalǵan Kodeks keden isi salasyndaǵy keden zańnamasymen rettelmegen quqyqtyq qatynastardy retteıtin bolady. Sondyqtan da, qujat boıynsha keden odaǵyna múshe memleketterdiń aýmaǵynan shyǵatyn taýarlardy, sondaı-aq úshinshi elderden ákelinetin jáne belgilengen tártippen keden odaǵynyń taýarlary mártebesin alǵan taýarlardy kedendik rásimdeý men kedendik alyp tastaý sharalary kózdeledi. Budan bólek zań aıasynda arnaıy jeńildikterdi paıdalanatyn ýákiletti ekonomıkalyq operator ınstıtýtyn engizý jumystary qarastyrylyp, taýarlar men kólik quraldaryna qatysty kedendik baqylaýdy júrgizý negizderi men tásilderi qamtylady.
Endi atalǵan zań Memleket basshysynyń qol qoıýyna jiberiledi.
