Parlament: Qazaqstanda azaptaýlardy boldyrmaýdy qarastyratyn ulttyq aldyn alý tetigi alǵash ret engiziledi
ASTANA. 20 maýsym. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine azaptaýlardyń jáne basqa da qatygez, adamgershilikke jatpaıtyn nemese ar-namysty qorlaıtyn is-áreketter men jazalaý túrleriniń aldyn alýǵa baǵyttalǵan ulttyq aldyn alý tetigin jasaý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
«Aldyn alý tetiginiń máni azaptaýlardyń jáne basqa da qatygez, adamgershilikke jatpaıtyn nemese ar-namysty qorlaıtyn áreketter men jazalaý túrleriniń aldyn alý maqsatynda bas bostandyǵynan aıyrylǵandardy ustaý oryndarynda únemi bolyp turý júıesin qurýda jatyr. Zań jobasynyń jańalyǵy Adam quqyqtary jónindegi ýákil jáne azamattyq qoǵam ókilderi arqyly zańnamalyq deńgeıde ulttyq aldyn alý tetiginiń alǵash ret engizilýi bolyp otyr», - deıdi Ádilet mınıstri Berik Imashev.
Atalǵan qujat Azaptaýlarǵa jáne basqa da qatygez, adamgershilikke jatpaıtyn nemese ar-namysty qorlaıtyn is-áreketter men jazalaý túrlerine qarsy konventsııany iske asyrý maqsatynda ázirlengen. Bul rette, zań jobasynyń maqsaty túzeý mekemeleri men tergeý ızolıatorlarynda, alkogolızmge, nashaqorlyq pen ýytqumarlyq dertine shaldyqqan aýrýlardy emdeýdi júzege asyratyn mekemelerde Adam quqyqtary jónindegi ýákildiń, qoǵamdyq baıqaýshy komıssııalar men qoǵamdyq birlestikterdiń únemi bolý júıesin ulttyq aldyn alý tetigi retinde bekitýdi kózdeıdi. Sondaı-aq, atalǵan tulǵalar men uıym ókilderi qoǵamnan ýaqytsha oqshaýlaýdy qamtamasyz etetin arnaýly mekemelerde, kámeletke tolmaǵandardy beıimdeý ortalyqtarynda, arnaýly jáne erekshe rejimdegi bilim berý uıymdarynda udaıy bola alatyny qarastyrylady.
Osyǵan oraı, zań jobasymen QR Qylmystyq kodeksine, Ákimshilik quqyq buzý týraly kodeksine jáne birqatar zańnamalarǵa ózgerister engizý usynylady.
