Parlament Qazaqstan men Ispanııa arasyndaǵy Strategııalyq áriptestik týraly shartty ratıfıkatsııalady
ASTANA. Mamyrdyń 13-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasy men Ispanııa Koroldigi arasyndaǵy Strategııalyq áriptestik týraly shartty ratıfıkatsııalaý týraly» zańdy qabyldady,
dep habarlaıdy QazAqparat.
Eki memleket arasyndaǵy atalǵan shart saıası, ekonomıkalyq, ǵylymı-tehnıkalyq, ekologııalyq, aqparattyq, gýmanıtarlyq, mádenıet jáne basqa da salalardaǵy ekijaqty yntymaqtastyqqa jańa sapa berý maqsatynda ázirlengen.
Qujatqa sáıkes, taraptar ózderiniń qarym-qatynastaryn teńdik, ózara senim, strategııalyq áriptestik jáne jan-jaqty yntymaqtastyq negizinde quratyn bolady. Sonymen birge, eki memleket beıbitshilikti nyǵaıtý, turaqtylyq pen qaýipsizdikti arttyrý maqsattaryna ózara is-qımyldar jasaıdy. Shartqa oraı, Taraptar ózderiniń ulttyq zańnamalaryna jáne halyqaralyq mindettemelerine sáıkes ekinshi Tarap aýmaǵynda bir Taraptyń zańdy jáne jeke tulǵalarynyń zańdy quqyqtary men múddelerin qamtamasyz etýge kepildik beretin tıimdi sharalar qabyldaıdy.
Sonymen birge, Qazaqstan men Ispanııa Strategııalyq áriptestik týraly shart sheńberinde áskerı jáne áskerı-tehnıkalyq salalarda da yntymaqtasatyn bolady. Jekelegen kelisimder negizinde tıisti vedomstvolar arasyndaǵy baılanystarǵa járdemdesedi, áskerı kadrlar daıarlaý salasynda eki jaqty yntymaqtastyqty damytady. Saýda-ekonomıkalyq yntymaqtastyqty keńeıtip, tereńdete túsý úshin qolaıly jaǵdaılardy qamtamasyz etetin bolady.
