Parlament kásipkerlik sýbektilerdi tirkeýdi ońaılatýǵa baǵyttalǵan zańdy qabyldady
ASTANA. Jeltoqsannyń 23-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda «QR keıbir zańnamalyq aktilerine zańdy tulǵalardy memlekettik tirkeýdi jáne fılıaldar men ókildikterdi eseptik tirkeýdi ońaılatý máseleleri boıynsha ózgerister men tolyqtyrýlar engizý týraly» zań jobasyna Parlament Senaty engizgen ózgerister talqylandy.
Ol boıynsha joǵary palata depýtattarynyń túzetýlerimen kelisken Májilis qujatty qabyldady, dep habarlaıdy QazAqparat.
Atalǵan zań jobasy Úkimettiń, Ulttyq banktiń, Qarjy naryǵyn jáne qarjy uıymdaryn retteý men qadaǵalaý agenttiginiń ekonomıkany jáne qarjy júıesin turaqtandyrý jónindegi 2009-2010 jyldarǵa arnalǵan birlesken is-sharalar josparyn oryndaý maqsatynda ázirlengen. Bul rette tirkeý rásimderin odan ári ońaılatý maqsatynda zańdy tulǵalardy - shaǵyn jáne orta, iri kásipkerlik sýbektilerin tirkeý (qaıta tirkeý) merzimderin qysqartý kózdeledi. Sonymen birge, qujat boıynsha shaǵyn kásipkerlik sýbektisi bolyp tabylatyn jaýapkershiligi shekteýli seriktestiginiń eń tómengi jarǵylyq kapıtalyn júz aılyq eseptik kórsetkish mólsherinen on aılyq eseptik kórsetkish mólsherine deıin tómendetý usynylady.
Májilis maquldaǵan zań jobasyna senatorlar birqatar túzetýler engizgen bolatyn. Máselen, Senat shaǵyn kásipkerlik sýbektileri bolyp tabylatyn sharýashylyq seriktestikteriniń quryltaı qujattaryn notarıaldyq kúshin joıýǵa, halyqqa qyzmet kórsetý ortalyqtaryn ádilet organdarynan jergilikti atqarýshy organdarǵa berýge, sondaı-aq JShS nysanynda qurylatyn shaǵyn kásipkerlik sýbektileri úshin jarǵylyq kapıtaldyń eń tómengi mólsherin 100 teńgege deıin qysqartýǵa qatysty túzetýler jasady. Budan basqa, birqatar ózgertýler redaktsııalyq sıpatty qamtyp otyr. Osyǵan baılanysty Májilis Senat engizgen ózgeristerge kelisim berip, qujatty qabyldady. Endi Parlament qabyldaǵan zań Elbasynyń qol qoıýyna jiberiledi.
