Parlament qarjylyq monıtorıng júrgiziletin sýbektiler tizbesin keńeıtetin qujatty maquldady
ASTANA. QazAqparat - Búgin Senattyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
QR Qarjy mınıstri Baqyt Sultanovtyń aıtýynsha, zań jobasy birinshiden, kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi Eýrazııalyq toptyń ózara baǵalaý esebindegi eskertýlerdi iske asyrýdy kózdeıdi. Ekinshiden, halyqaralyq standarttardy engizý jáne qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl salasyndaǵy ulttyq júıeni odan ári jetildirý qarastyrylady.
Bul rette zań jobasy boıynsha qarjy monıtorıngilerine jatatyn sýbektiler tizbesi keńeıtiledi. Sonymen qatar halyqaralyq standarttarǵa sáıkes, Qazaqstan qarjylyq qyzmet kórsetetin barlyq tulǵalardy qarjylyq monıtorıngimen qamtýy kerek. Osyǵan baılanysty qarjy monıtorıngi jasalatyn tizimge birqatar sýbektiler engizilgeli otyr. Atap aıtqanda, birinshiden, lızıng berýshi retinde lızıngtik qyzmetti lıtsenzııalaýsyz júzege asyratyn tulǵalar, lombardtar, qymbat baǵaly metaldar men tastar jáne olardan ázirlengen zergerlik buıymdarmen jasalatyn operatsııalardy júzege asyratyn zańdy tulǵalarǵa monıtorıng jasalady. Budan bólek, jyljymaıtyn múlikti satyp alý-satý kezindegi deldaldyq qyzmet kórsetetin tulǵalar, tólem qabyldaý jónindegi operatorlar da baqylaýǵa jatady.
Aıta keterligi, qoldanystaǵy zańǵa sáıkes, qazirgi kezde 12 sýbektisi qarjy monıtorıngisine engizilgen. Budan bólek, zań jobasymen qylmystyq jolmen alynǵan kiristerdi zańdastyrýdyń jáne terrorızmdi qarjylandyrýdyń aldyn alý tásilderi jetildiriledi. Tutastaı alǵanda, qabyldanǵan sharalar kóleńkeli ekonomıkanyń kólemin kemitýge, sybaılas jemqorlyq qylmystardyń jolyn kesýge, sonymen birge Qazaqstannyń ınvestıtsııalyq tartymdylyǵyn arttyrýǵa baǵyttalǵan.
