Parlament qaraýyna engiziletin zań jobalarynyń qazaq jáne orys tilindegi túpnusqalary boıynsha ǵylymı lıngvıstıkalyq saraptama júrgiziledi

Bul týraly búgin Ádilet mınıstrliginde ótken baspasóz máslıhatynda atalǵan vedomstvonyń resmı ókili Erbolat Erimbet málim etti.

Ádilet mınıstrliginiń bastamasymen «Normatıvtik quqyqtyq aktiler týraly» Zańǵa ózgerister engizilgenin atap ótken ol: «Osyǵan oraı budan bylaı memlekettik organdarmen ázirlenip, Parlament qaraýyna engiziletin zań jobalarynyń qazaq jáne orys tilindegi túpnusqalary boıynsha ǵylymı lıngvıstıkalyq saraptama júrgiziledi», - dedi.

Onyń atap ótýinshe, zań jobalarynyń Parlamente qaralý barysynda úzdiksiz ǵylymı óńdeý jasaýdy qamtamasyz etý maqsatynda Ádilet mınıstrligi zań jobasyn qarastyrý úshin qurylatyn palata jumys tobynyń quramyna saraptama júrgizýge qatysqan ǵalymdardy mindetti túrde tartý usynylady. Qazirgi ýaqytta olar tek qajettilik týyndaǵanda ǵana jumyldyrylady.

«Parlamenttiń jumys toptarynda zań jobasyn qaraý barysynda engiziletin depýattardyń barlyq usynystaryna ǵylymı quqyqtyq saraptama júrgizý máselesin qarastyrý usynylýda», - dedi resmı ókil.