Parlamentte qabyldanǵan zańdar el ıgiline qyzmet etedi dep senemiz – Máýlen Áshimbaev
ASTANA. KAZINFORM – Senat tóraǵasy Máýlen Áshimbaev 7-shi shaqyrylymdaǵy Parlamenttiń 2-sessııasyndaǵy palata jumysyn qorytyndylady.
«Búgin biz palatanyń 2-sessııadaǵy jumysyn aıaqtap, qorytyndy otyrysymyzdy ótkizdik. Sessııa barysynda Memleket basshysynyń «Ádiletti Qazaqstan» qurý jolyndaǵy tapsyrmalaryn zańnamalyq turǵyda qamtamasyz etý úshin aýqymdy jumys atqaryldy. Joldaýda, Úkimettiń keńeıtilgen otyrysynda jáne Ulttyq quryltaıda aıtylǵan, sondaı-aq Prezıdentimizdiń ózge de tapsyrmalaryn oryndaý depýtattardyń basty nazarynda boldy. Jalpy, Parlament 2-sessııada 102 zań qabyldady. Olardyń úshten birine depýtattyq korpýs bastamashy bolǵanyn atap ótken jón. Sondaı-aq 9 derbes zań qabyldandy. Atap aıtsaq, «QR azamattarynyń memleket isterin basqarýǵa qatysýyn qamtamasyz etetin qoǵamdyq baqylaý týraly» zań qabyldandy. Adam saýdasyna qarsy is-qımyldyń quqyqtyq negizderi men tıimdiligin arttyrýǵa, adam saýdasy qurbandarynyń múddelerin qorǵaýǵa arnalǵan zań da maquldandy. Sonymen qatar áıelder men balalardyń konstıtýtsııalyq quqyqtary men múddelerin qorǵaý úshin qylmystyq jáne ákimshilik quqyq buzýshylyq týraly zańnama qaıta qaralyp, kúsheıtildi. Buǵan qosa, býllıng, kıberbýllıng úshin jaýapkershilik engizildi. Qoǵamda keń taraǵan taǵy bir dert — lýdamanııaǵa qarsy is-sharalary qolǵa alyndy», — dedi Máýlen Áshimbaev palatanyń jalpy otyrysynda.
Onyń atap ótýinshe, oıyn bıznesin uıymdastyrýshylarǵa jaýapkershilik sharalary kúsheıtilip, jarnama talaptaryna qosymsha shekteý qoıyldy. BAQ qyzmetkerleriniń múdddelerin qamtamasyz etetin jáne osy salada sapaly quqyqtyq model qalyptastyratyn mass-medıa týraly zań qabyldandy. Memleket basshysy Joldaýda tapsyrǵan memlekettik satyp alýdyń jańa júıesi arnaıy zańmen bekitildi. Jylý energetıkasy týraly derbes jańa zań da qabyldandy.
«Bul zań osy saladaǵy kúrdeli ınfraqurylymdyq máselelerdiń sheshilýine oń septigin tıgizedi dep senemiz. Áleýmettik qoldaý salasyndaǵy zańnama da aıtarlyqtaı jańardy. Memleket basshysynyń tapsyrmasymen «Ulttyq qor balalarǵa» jobasy iske asyryla bastady. Densaýlyq saqtaý salasyndaǵy birqatar ózekti máseleni sheshýge, sondaı-aq densaýlyq saqtaý júıesin odan ary jetildirýge arnalǵan zańdar qabyldandy. Bıznestiń damýy úshin barynsha qolaıly jaǵdaı jasaýdy kózdeıtin aýqymdy túzetýler de qarastyryldy. Kásipkerlerge ákimshilik júkteme azaıtylyp, negizsiz kedergiler alynyp tastaldy. Jalpy, palatanyń qaraýyna túsken zańdar sheshim qabyldanar aldynda máslıhat depýtattarymen jáne sarapshylarmen keńinen talqylanyp, jan-jaqty zerdelenip otyrdy. Osy jáne basqa da qabyldanǵan zańdar el ıgiline qyzmet etedi dep senemiz», — dedi Senat spıkeri.
