Parlament halyqaralyq kommertsııalyq tórelik qyzmetin jetildirýge baǵyttalǵan zańdy qabyldady
ASTANA. Qańtardyń 15-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «QR keıbir zańnamalyq aktilerine memlekettiń jáne onyń menshiginiń ımmýnıteti,
aralyq sottar jáne halyqaralyq kommertsııalyq tórelik qyzmetin jetildirý máseleleri boıynsha ózgerister men tolyqtyrýlar engizý týraly» zań jobasy boıynsha qos palata arasyndaǵy kelispeýshilikti eńserý jónindegi kelisim komıssııasynyń usynystary talqylanyp, qujat qabyldandy, dep habarlaıdy QazAqparat.
Zańdy ázirleý qajettigi qoldanystaǵy ulttyq zańnamada tórelik jáne aralyq organdardyń, sondaı-aq daýlardy sheshý tásili retinde tórelik nemese aralyq sottar is qaraý rásimin tańdaý kezindegi problemalar týǵyzatyn qarama-qaıshy normalardyń oryn alýyna baılanysty týyndaǵan. Osyǵan oraı, qujat boıynsha Qazaqstannyń qoldanystaǵy Azamattyq jáne Azamattyq is júrgizý kodeksterine túzetýler engiziledi.
Budan basqa, zań jobasy halyqaralyq tórelik jáne aralyq is qaraýdan memlekettiń jáne onyń múlkiniń ımmýnıtetin retteýge baǵyttalady. Sondaı-aq qujatqa baılanysty aralyq sottyń jáne kommertsııalyq tóreliktiń quzyretin shekteý, sheshimderdi qoldanysqa engizý, oryndaý jáne toqtata turý sekildi sharalar qamtylatyn bolady.
Qos palata arasyndaǵy kelisim komıssııasy 5 ustanymnan turatyn túzetýlerdi talqylap, sheshim shyǵardy. Bulardyń 2-eýi Senat redaktsııasynda, qalǵany birlesken redaktsııada qabyldandy.
Parlament qabyldaǵan zań Elbasynyń qol qoıýyna jiberiledi.
