Parlament «Ǵylym týraly» zańdy qabyldady
ASTANA. 27 qańtar. QazAqparat /Qanat Mámetqazyuly/ - Búgin QR Parlamenti Cenatynyń jalpy otyrysynda palata depýtattary «Ǵylym týraly» QR Zańyn qabyldady.
Zań Memleket basshysynyń Parlamenttiń sessııasyn ashý barysynda júktegen tapsyrmasyn, sondaı-aq 2009 jylǵy qyrkúıekte ǵylym jónindegi keńeste alǵan qoıǵan mindetterdi sheshý maqsatynda ázirlengen bolatyn. Bul rette qujat qoǵam talabyna jaýap beretin, elimizdiń básekege qabilettiligin arttyrýǵa baǵyttalǵan jańa ulttyq ǵylym júıesin qurýdyń quqyqtyq negizin aıqyndaıdy. Zańnyń maqsaty elimizdegi ǵylymı júıeniń básekege qabilettiligine jáne teńgerimdiligine qol jetkizý úshin jaǵdaılar jasaý bolyp tabylady.
Parlament qabyldaǵan zańda negizinde ǵylymdy basqarýdyń múldem jańa modeli usynylady. Bul basty eki quramdas bólikten turady. Birinshiden, sheshim qabyldaýdyń barlyq kezeńindegi ǵalymdar róli aıryqsha kóteriledi. Jańa júıe ǵylym júıesiniń barlyq qatysýshylarynyń fýnktsııalaryn ońtaılandyrady jáne artyq bıýrokratııalyq basqarýǵa jol bermeıdi. Budan bólek, zań boıynsha ǵylymdy basqarý júıesindegi strategııalyq, ákimshilik jáne saraptamalyq fýnktsııalardy naqtylaýdy qarastyrady. Bul úshin joǵary ǵylymı tehnıkalyq komıssııanyń fýnktsııalary keńeıtilip, Ulttyq ǵylymı keńesterge jiti nazar aýdarylady. Bular jetekshi qazaqstandyq jáne sheteldik ǵalymdardan qurylyp, jobalar men baǵdarlamalardyń oryndalýy týraly túpkilikti sheshim qabyldaıtyn bolady. Sonymen qatar, zańda Memlekettik ǵylymı-tehnıkalyq saraptamanyń ulttyq ortalyǵy qurylatyny kózdeledi. Ortalyq jobalar men baǵdarlamalardy táýelsiz, kásibı baǵalaýdy qamtamasyz etedi.
Budan bólek, Parlament qabyldaǵan qujatta ǵylymı ázirlemelerdi praktıkada qoldaný tetigin engizýge, sondaı-aq joǵary oqý oryndarynyń ǵylymı, ǵylymı-tehnıkalyq jáne ınnovatsııalyq qyzmetine erekshe kóńil bólinedi. Ǵylymı qyzmetkerlerdi áleýmettik qamsyzdandyrý sharalary da bekitiledi.
Qujat Memleket basshysynyń qol qoıýyna jiberiledi.
