Parlament Eýropa mádenı konventsııasyn qabyldady
ASTANA. 25 qarasha. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Eýropa mádenı konventsııasyn ratıfıkatsııalaý týraly» zańy qabyldandy.
Atalǵan qujattyń maqsaty 1954 jyly 19 jeltoqsanda Parıj qalasynda jasalǵan Konventsııany qabyldaý bolyp tabylady. Konventsııaǵa qosylý Qazaqstannyń Eýropa memletteriniń tilderin, tarıhy men mádenıetin zerdeleýi úshin múmkindiginshe jaǵdaılar jasaı otyryp, dúnıejúzilik mádenı keńistikke kirigýine járdemdesedi. Sondaı-aq Konventsııa jalpy eýropalyq mádenı qundylyǵy bar zattardy qorǵaýdyń quqyqtyq qaǵıdattaryn belgileıdi jáne olarǵa durys qol jetkizilýin qamtamasyz etedi.
«Eýropa Konventsııasyna qosylý elimiz úshin Eýropa elderimen yntymaqtastyqty nyǵaıtý men keńeıtýge óz úlesin qosatyn bolady. Budan bólek, osy arqyly birlesken mádenı, aǵartýshylyq jáne basqa da jobalardy júzege asyrýǵa múmkindik bolady. Elimizdiń mádenıet jáne bilim salasynyń básekege qabilettiligin arttyrady», - dedi qujat boıynsha baıandama jasaǵan QR Mádenıet mınıstrligiń Jaýapty hatshysy Janna Qurmanǵalıeva. Onyń aıtýynsha, Konventsııa qazaqstandyq sarapshylardyń Eýropa keńesiniń mamandandyrylǵan komıtetteriniń otyrystaryna qatysýyna múmkindik beredi. Budan bólek, «Eýropaǵa jol» baǵdarlamasyndaǵy mindettemeler aıasynda da qujatty qabyldaý ózekti bolyp tabylady.
Sonymen qatar, Konventsııaǵa qosylý Konventsııaǵa qatysýshy memleketterdiń tilin, tarıhyn jáne mádenıetin zertteýdi damytýǵa, sondaı-aq Eýropalyq bilim mınıstrleriniń 1999 jylǵy 19 maýsymdaǵy «Eýropa joǵary bilim keńistigi» ortaq málimdemesine (Bolon deklaratsııasy) qatysýshy memleketter qurǵan Bolon protsesine qatysýǵa múmkindik beredi. Osynyń aıasynda Eýropa memleketteri tarapynan Qazaqstan Respýblıkasynyń joǵary oqý oryndarynyń dıplomdary tanylady.
Qujat Memleket Basshysynyń qol qoıýyna jiberildi.
