Parlament EýrAzEQ sheńberinde keden qyzmetkerleriniń yntymaqtastyǵy týraly kelisimdi qabyldady
ASTANA. 1 qarasha. QazAqparat - Búgin QR Parlamenti Senatynyń jalpy otyrysynda palata depýtattary
«Eýrazııalyq ekonomıkalyq qoǵamdastyq sheńberinde Keden odaǵyna múshe memleketterdiń keden qyzmetteri ókildikteriniń qyzmet máseleleri boıynsha keden isterindegi yntymaqtastyq jáne ózara kómek týraly kelisimdi ratıfıkatsııalaý týraly» zańyn qabyldady.
Atalǵan kelisimge 2011 jyldyń 22 maýsymynda Máskeýde qol qoıylǵan. Bul rette, kelisim Keden odaǵyna múshe memleketterdiń keden qyzmetteri ókildikteri qyzmetkerleriniń bolýy men ózara is-qımylynyń quqyqtyq negizderin reglamentteý maqsatynda ázirlengen.
Kelisimge sáıkes keden qyzmeti ókildiginiń qyzmetkerleri keden zańnamasynyń oryndalýyna monıtorıngti, usynystar daıarlaýdy, kedendik shekaradaǵy ótkizý pýnktterindegi memlekettik baqylaý túrleriniń júzege asyrylýyna taldaý jasaıdy.
Sonymen qatar Keden odaǵynyń kedendik shekarasy arqyly ótkiziletin taýar aǵymdary týraly derekterdi taldaýdy júzege asyrady. Budan bólek ózderi bolatyn eldiń keden qyzmetinde qoldanylatyn kedendik tehnologııalardy zerdeleıdi jáne oń tájirıbeler týraly habardar etip, aqparattar almasýǵa qatysady.
Parlament qabyldaǵan zań Memleket basshysynyń qol qoıýyna jiberiledi.
