Parlament energııa únemdeýge baǵyttalǵan zańdy qabyldady
ASTANA. QazAqparat - Búgin Parlament Májilisiniń jalpy otyrysynda «Energııa únemdeý jáne energııa tıimdiligin arttyrý týraly» QR zańyna ózgerister men tolyqtyrýlar engizý týraly» Zańy qabyldandy. Eske salaıyq, buǵan deıin Májilis maquldaǵan zań jobasyna Senat ózgerister engizgen bolatyn. Palata depýtattary atalǵan túzetýlerge kelisim berdi.
Qujat energııa tıimdiligin arttyrý tetigin odan ári jetildirý jáne óndiris sektory men energııa resýrstaryn tutyný salasynda ozyq energııalyq tıimdi tehnologııalardy qoldaný maqsatynda ázirlengen. Toqtala ketetin jaıt, 2012 jyly elimizde energııa únemdeý men energııa tıimdiligine qatysty jańa zań qabyldanǵan bolatyn. Sonyń nátıjesinde energııa únemdeý baǵdarlamasyn júzege asyrýǵa múmkindik týdy. Qazirgi tańda memlekettik energetıkalyq reestr quryldy, oǵan 4 myńnan astam uıymdar ense, 60 energııa-aýdıtorlyq kompanııa akkredıttelgen. Sonymen bir mezgilde energııa únemdeý sharalaryn qarjylandyrý baǵytynda belgili bir qıynshylyqtar oryn alýda. Osyǵan baılanysty, zań jobasy energııa-servıstik kompanııalardyń qyzmetin júzege asyrý úshin zańnamalyq negiz qalyptastyrylady.
Tutastaı alǵanda, Parlament qabyldaǵan zań energııa-servıstik kompanııanyń óz shyǵyndarynyń ornyn toltyra otyryp, tartylǵan qarajaty esebinen energııany únemdeý tehnologııalaryn engizý jóninde jeke jáne zańdy tulǵalarmen sharttar jasaýǵa múmkindik beredi. Al onyń nátıjesinde energııa shyǵyndarynyń qol jetkiziletin únemdelýinen qarjylaı paıda alý kózdeledi. Senatorlar energııa menedjment júıesin qurý, engizý men uıymdastyrýǵa mindettemeler belgileý men baqylaý jasaý normalaryn alyp tastaýdy usynǵan bolatyn.
