Parlament elimizdiń ákimshilik-aýmaqtyq qurylysyn jetildiretin qujatty 1-oqylymda maquldady
ASTANA. KAZINFORM – Búgin Parlament palatalarynyń birlesken otyrysynda «Qazaqstan Respýblıkasynyń ákimshilik-aýmaqtyq qurylysy týraly» Konstıtýtsııalyq zań birinshi oqylymda maquldandy. Qujatty Ulttyq ekonomıka vıtse-mınıstri Baýyrjan Omarbekov tanystyrdy.
– Júrgizilgen konstıtýtsııalyq reforma aıasynda elimizdiń ákimshilik-aýmaqtyq qurylysyn jetildirý erekshe mańyzǵa ıe bolyp otyr. Osy oraıda «Qazaqstan Respýblıkasynyń ákimshilik-aýmaqtyq qurylysy týraly» Konstıtýtsııalyq zań jobasy jańa Konstıtýtsııanyń talaptaryna sáıkes jáne qoldanystaǵy ákimshilik-aýmaqtyq qurylys týraly zańnyń negizinde ázirlendi. ıAǵnı, burynnan qalyptasqan quqyqtyq júıeniń sabaqtastyǵy saqtalyp, memlekettiń birligi men tutastyq qaǵıdaty qamtamasyz etiledi, - dedi ol.
Vıtse-mınıstrdiń atıýynsha, konstıtýtsııalyq zań jobasyna ákimshilik-aýmaqtyq birlikterdi aıqyndaý, olardy qurý, qaıta qurý jáne taratý, sondaı-aq memlekettik organdardyń ókilettikterin belgileýge qatysty normalar engizildi. Sonymen birge tarıhı qalyptasqan óńirlik erekshelikter de eskerilip, ákimshilik-aýmaqtyq birlikterdiń sanattary bekitilgen.
– Ákimshilik-aýmaqtyq birlikterdiń sanattaryna sáıkes qalalyq eldi mekenderge barlyq deńgeıdegi qalalar, al aýyldyq eldi mekenderge ózderiniń ákimshilik baǵynystylyǵyna qaramastan, barlyq aýyldar men kentter jatqyzylady. Buǵan qosa, zań jobasynda Memleket basshysynyń, Úkimettiń jáne memlekettik basqarý organdary arasyndaǵy ókilettikterdi belgileý kózdelgen, - dedi Baýyrjan Omarbekov.
Onyń naqtylaýynsha, Prezıdent:
– oblystar men aýdandardy qurady jáne taratady;
– eldi mekenderdi respýblıkalyq, oblystyq jáne aýdandyq mańyzy bar qalalar sanatyna jatqyzady.
Al Úkimet Prezıdenttiń qaraýyna oblystar men aýdandardy qurý jáne taratý, eldi mekenderdi respýblıkalyq, oblystyq jáne aýdandyq mańyzy bar qalalardyń sanattaryna jatqyzý jáne basqa da ákimshilik-aýmaqtyq máseleler boıynsha usynystardy engizedi. Sonymen qatar, astananyń, oblystardyń jáne respýblıkalyq mańyzy bar qalalardyń shekaralaryn belgileý jáne ózgertý jáne basqa da quzyretteri bar.
– Jergilikti ókildi jáne atqarýshy organdardyń ákimshilik-aýmaqtyq qurylys máselelerin sheshýdegi quzyretteri de aıqyndalǵan. Olarǵa eldi mekenderdi kent, aýyldar sanattaryna jatqyzý, olardyń oblys, aýdan sheginde ákimshilik baǵynystylyǵyn belgileý, shekaralaryn bekitý, ózgertý jáne basqa da máselelerdi sheshý jatady. Konstıtýtsııalyq zań jobasynda qala, aýyl jáne kent mártebesine qatysty naqty talaptar qarastyrylǵan. Atalǵan norma eldi mekenderdiń mártebesin negizsiz ózgertýge jol bermeıdi jáne bul rásim belgilengen ýaqyt kezeńindegi áleýmettik-ekonomıkalyq damý kórsetkishteri men turǵyndardyń pikiri negizinde ǵana iske asyrylatyn bolady, - dedi vıtse-mınıstr.
Onyń atap ótýinshe, tsıfrlandyrý talaptaryn eskere otyryp, ákimshilik-aýmaqtyq birlikter men olardyń shekaralaryn aqparattyq júıede esepke alý jáne tirkeý boıynsha quzyretter bekitiledi.
– Budan bólek, eldi mekenderdiń shekaralaryn belgileý jáne ózgertý bas josparlar nemese damý shemalary negizinde júzege asyrylatyn bolady. Bul qala qurylysy men aýmaqtyq josparlaýdyń ózara baılanysyn kúsheıtedi. Zań jobasynda ákimshilik-aýmaqtyq qurylys máselelerin sheshýge qajetti qujattar men materıaldardyń tizbesi belgilenetin bolady. Jalpy alǵanda, zań jobasy elimizdiń aýmaqtyq tutastyǵyn nyǵaıtýǵa jáne memlekettik basqarý tıimdiligin arttyrýǵa baǵyttalǵan, - dedi Baýyrjan Omarbekov.
Májilis depýtaty Muqash Eskendirovtiń atap ótýinshe, konstıtýtsııalyq zań jobasy Qazaqstan Respýblıkasynyń ákimshilik-aýmaqtyq qurylymynyń negizgi uǵymdaryn, maqsattaryn, mindetteri men qaǵıdattaryn aıqyndaıdy.
– Sondaı-aq ákimshilik-aýmaqtyq qurylymdar máselelerin sheshý tártibin, ákimshilik-aýmaqtyq birlikterdi qurý jáne taratý, olardyń shekaralaryn belgileý jáne ózgertý, ákimshilik-aýmaqtyq birlikterdi esepke alý jáne tirkeý, ákimshilik-aýmaqtyq birlikterge ataý berý jáne qaıta ataý máselelerin sheshý kezinde memlekettik bılik organdarynyń ókilettikterin aıqyndaıdy. Ákimshilik-aýmaqtyq qurylymnyń normalaryn Konstıtýtsııalyq zań deńgeıinde bekitý memlekettiń aýmaqtyq uıymynyń turaqtylyǵy men ornyqtylyǵyn qamtamasyz etedi, sondaı-aq memlekettik basqarý organdarynyń qyzmeti úshin ornyqty quqyqtyq negiz qalyptastyrady, - dedi ol.
