Parlament ekinshi deńgeıli bankterdi qaıta uıymdastyrýǵa baǵyttalǵan zańdy qabyldady
ASTANA. QazAqparat - Búgin Májilistiń jalpy otyrysynda palata depýtattary «Qazaqstan Respýblıkasynyń keıbir zanamalyq aktilerine ekinshi deńgeıdegi bankterdi qaıta uıymdastyrý máseleleri boıynsha ózgerister men tolyqtyrýlar engizý týraly» zań jobasy talqylandy. Májilis maquldaǵan osy qujatqa Senat tarapynan birqatar túzetý engizilgen bolatyn.
Zań jobasy negizinen ózderine qatysty qaıta qurylymdaý júrgizilgen ekinshi deńgeıdegi bankterdi qaıta uıymdastyrý jáne olardyń aktsııalaryn ıelikten shyǵarý máselesin jetildirýge baǵyttalady. Bul rette qosylý túrindegi qaıta uıymdastyrý kezinde basqa bank aktsııalaryn satyp alýǵa shekteýdi alyp tastaý, banktik, holdıngtik nemese iri qatysýshysy mártebesin ońtaılandyrý usynylady. Al bankterdiń birigýi boıynsha qatysýshylardyń biriniń aktsııalary kepilde, tyıym salýda bolǵan jaǵdaıda, emınentterdiń qaıta uıymdastyrýdaǵy kepilzatyn aýystyrýǵa tyıym salý tetikteri kózdeledi. Jalpy, zań jobasy Memleket basshysynyń qaıta qurylymdaýdan ótken ekinshi deńgeıli bankterdiń, naqty aıtqanda BTA, «Alıans Bank» jáne «Temirbankterdiń» qatarynan memlekettiń shyǵýy týraly tapsyrmasyn oryndaý úshin de qajet bolyp tabylady. Senatorlar Májilis maquldaǵan qujatqa jeti túzetý engizgen bolatyn. Onyń úsheýi qaıta qurylymdanatyn banktiń elý paıyzynan kem bolatyn aktsııalardy ıelený jaǵdaıyna qatysty túzetýler. Májilis depýtattary Senat tarapynan engizilgen túzetýlerge kelisim berip, qujatty qabyldady.
