Parlament EAEO-da Armenııanyń saýda qatynasyn jaqsartýǵa járdemdesetin zańdy qabyldady

NUR-SULTAN. QazAqparat – Parlament Senatynyń jalpy otyrysynda «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Armenııa Respýblıkasynyń qosylýy týraly 2014 jylǵy 10 qazandaǵy shartqa ózgerister engizý týraly hattamany ratıfıkatsııalaý týraly» Zańy qabyldandy, dep habarlaıdy QazAqparat tilshisi.

«Armenııa Respýblıkasynyń Eýrazııalyq ekonomıkalyq odaqqa qosylý barysynda 2022 jylǵy 1 qańtarǵa deıin keıbir taýarlarǵa qatysty Eýrazııalyq ekonomıkalyq odaqtyń Biryńǵaı kedendik tarıfinde kózdelgennen neǵurlym tómen ımporttyq kedendik bajdardy qoldaný múmkindigi berilgen», - dedi QR Saýda jáne ıntegratsııa mınıstri Baqyt Sultanov.

Onyń aıtýynsha, 2019 jylǵy jeltoqsanda Joǵary Eýrazııalyq ekonomıkalyq keńes barysynda Armenııa Respýblıkasynyń Premer-Mınıstri Biryńǵaı kedendik tarıfke kóshý kezeńin uzartý týraly ótinish bildirdi. Eýrazııalyq ekonomıkalyq odaq memleketteriniń basshylary, sondaı-aq Joǵary Eýrazııalyq ekonomıkalyq keńestiń qurmetti tóraǵasy – QR Tuńǵysh Prezıdenti-Elbasy Nursultan Nazarbaev ótpeli kezeń 2019 jyly aıaqtalǵan taýarlarǵa qatysty tómen ımporttyq bajdardy qoldaný merzimin 1 jylǵa uzartýǵa kelisti.

Osylaısha, 2020 jyly shyǵaryp tastaý tizbesi 647 taýar pozıtsııasyn qurady. 2021 jylǵy

1 qańtardan bastap Armenııada tek 94 taýar qaldy, olar boıynsha 2022 jylǵy 1 qańtarǵa deıin tómengi ımporttyq baj salyǵy qoldanylady. Bul et, jarma, kókónister, asyl tastar men jabdyqtar sııaqty taýarlar.