Parlament depýtaty: Tómengi aılyqty jeleý etip, jemqorlyqty aqtaý – qylmys
«Ómirde paradokstar az emes. Adamnyń densaýlyǵyn saqtaý boıynsha úlken tehnologııalarǵa Qazaqstannyń qoly jetip jatyr, ekinshi jaǵynan oqý mekemelerindegi paraqorlyq jaıly másele kóterip otyrmyz. Jer men kókteı máseleler, ıá?! Jyldar boıy jemqorlyqpen kúresip kelemiz. Memlekettik satyp alýda da, kóptegen salada kezdeskenimen, jemqorlyq bilim salasynda erekshe baıqalady. Sebebi, bul salada bizdiń qoǵam jemqorlyqpen jıi betpe-bet keledi. Bir jaǵynan alyp qarasańyz, jas stýdentterge, bozbala men boıjetkenderge jemqorlyq jıirkenishti bolýy kerek edi. Biraq, jaǵymsyz jaılar áli de kezdesip jatady», - dedi Beıbit Mamraev Úkimettiń baspasóz ortalyǵyndaǵy brıfıngte.
Májilis depýtatynyń aıtýyna qaraǵanda, qazirgi tańda kún tártibinde jemqorlyqqa qarsy kúres júrgizý úshin búkil qoǵam birige bilýi tıis.
«Meniń oıymsha, bizdiń bárimiz osy máseleni qolǵa alyp, sheshilý jolyn izdeýimiz kerek. Oqý mekemeleriniń muǵalimderiniń arasynda nelikten jemqorlar kóbeıip tur? Olar óz áreketterin nemen aqtaıdy? Bir jaǵynan tómengi aılyq deýi múmkin. Biraq, kim mamandyq tańdaýda kedergi keltirdi, mamandyqty aýystyrýǵa bireý qarsylyq tanytyp tur ma? Tómengi aılyqty jeleý etip, jemqorlyqty aqtaý – qylmysqa teń», - dedi ol.
Beıbit Mamraevtyń aıtýyna qaraǵanda, jemqorlyqqa jol bergen adamdardyń keselinen búkil bilim salasyna kóleńke túsedi.
Eske sala ketsek, «Nur Otan» partııasy Saıası keńesiniń keńeıtilgen otyrysynda QR Tuńǵysh Prezıdenti – Elbasy Nursultan Nazarbaev sybaılas jemqorlyqpen kúresti barynsha kúsheıtip, qatardy «tazartý» kerektigin málim etken bolatyn. Sonymen qatar JOO-lardaǵy jemqorlyq máselesi Qaýipsizdik keńesinde qaralatynyn atap ótti.
