Parlament depýtaty bilim salasyn qarjylandyrý máselesin kóterdi
«Bizdiń depýtattyq saýalymyz. Birinshiden, jan basyna shaqqandaǵy qarjylandyrýǵa tek qalalyq jalpy bilim beretin 1594 mektep ǵana kóshti. 2018 jyly tolyq jınaqty aýyldyq mektepterde jan basyna shaqqandaǵy qarjylandyrýdy synaqtan ótkizý jáne keıinnen tolyq kólemde engizý toqtatylyp, bul reforma aýyldyq bilim berý uıymdaryn qamtymady.
Elimizdegi 3987 tolyq jınaqty mektepterdiń, aýyldyq mektepteri 2393-ti quraıdy. Olardy jan basyna shaqqandaǵy qarjylandyrýdan alyp tastaý, bizdiń pikirimizshe, qala men aýyl mektepteri arasyndaǵy alshaqtyqty azaıtpaı, qaıta odan ári tereńdete túsedi», - dedi depýtat Májilistiń jalpy otyrysynda QR Premer-Mınıstriniń orynbasary Eraly Toǵjanovtyń atyna joldaǵan saýalynda.
Onyń paıymynsha, jan basyna shaqqandaǵy qarjylandyrýǵa tolyq kólemde kóshýdi baıaýlatýǵa bolmaıdy.
«Ekinshiden, jan basyna shaqqandaǵy qarjylandyrýdyń qoldanystaǵy modeli «aqsha oqýshyǵa arnalady» qaǵıdatyna saı kelmeıdi dep esepteımiz. Oqýshy bir óńirden ekinshi óńirge aýysqan kezde, tıisti shyǵyndar oqýshynyń sońynan ermeıdi», - dedi Bekturǵanov.
Joǵaryda aıtylǵandardyń negizinde mynadaı usynystar engizildi:
- 2021-2022 oqý jylynan bastap tolyq jınaqty aýyldyq mektepterde jan basyna shaqqandaǵy qarjylandyrý tetigin jáne olar úshin tıisti ádistemeni ázirleý jónindegi máseleni qaraý;
- «aqsha oqýshyǵa arnalady» degen negizgi qaǵıdatty iske asyrý maqsatynda, oqýshylardyń esebin júrgizý jáne ishki kóshi-qonǵa monıtorıng jasaý úshin jan basyna shaqqandaǵy qarjylandyrý jónindegi Ulttyq bilim berý derekqorynda basqa memlekettik organdardyń qoldanystaǵy derekqorlarymen bir mezgilde ıntegratsııalaı otyryp, jeke júıeni ázirleý.
