Parlament depýtattary Syr óńiri jurtshylyǵymen kezdesti
QYZYLORDA. QazAqparat - Qorqyt ata atyndaǵy QMÝ-niń Stýdentter saraıynda Qazaqstan Respýblıkasy Parlamenti depýtattarynyń oblys turǵyndarymen kezdesý jıyny ótti. Bul týraly QazAqparat HAA tilshisi habarlady.
Kezdesýge oblys ákiminiń orynbasarlary, oblystyq basqarma basshylary, quqyq qorǵaý organdary, «Nur Otan» partııasy oblystyq, qalalyq, aýdandyq fılıalynyń belsendileri, etnomádenı birlestiktiń jetekshileri, qala turǵyndary men BAQ ókilderi qatysty.
Jıyndy oblys ákiminiń orynbasary Rýslan Rústemov júrgizdi. Alǵy sózdi QR Parlament Senatynyń depýtaty Murat Muhamedov aldy. Ol Memleket basshysynyń jarııalaǵan eki mańyzdy qujattyń qundylyǵyna toqtaldy. Elbasymyzdyń arqasynda naryqtyq ekonomıka qaǵıdalaryna negizdelgen múldem jańa sıpatty memleket qurǵanymyzdy, «Qazaqstan-2030» strategııasyn júzege asyryp, jańa Elordamyzdy salǵanymyzdy atap ótti.
Sondaı-aq, konstıtýttsııalyq reformany keń túrde QR Parlamenti depýtattary Natalıa Jumadildaeva, Maıra Aısına, Mansurhan Mahambetov, Asylbek Smaǵulov, Abzal Eralıev talqyǵa saldy.
Jıyn barysynda Qazaqstan halqy Assambleıasy atynan saılanǵan halyq qalaýlysy Natalıa Jumadildaeva IT-bilimdi, qarjylyq saýattylyqty qalyptastyrýǵa, ultjandylyqty damytýǵa, qala men aýyl mektepteri arasyndaǵy bilim berý sapasynyń alshaqtyǵyn azaıtý jolyndaǵy jumystardy jandandyrý, úsh tildi oqýǵa kezeń-kezeńmen kóshý máselesine toqtaldy.
Munan soń, depýtattar Qyzylorda Temirjol klýbynda temirjolshylarmen júzdesti. Onda da kóptegen máseleler talqyǵa salynyp, aımaq turǵyndarynyń usynys-pikirleri tyńdalyp, naqty jaýaptary berildi.
Aldaǵy ýaqytta, halyq qalaýlylary 2-10 aqpan aralyǵynda qala, aýdandardy aralap, turǵyndar jáne túrli sala mamandarymen kezdesýler ótkizetin bolady.
