Parlament depýtattary senbilikke shyqty
ASTANA. 23 sáýir. QazAqparat /Qanat Mámetqazyuly/ - Búgin, 23 sáýir Astana ákiminiń qalany kógaldandyrý, sanıtarlyq tazalaý jáne abattandyrý boıynsha bekitken ekologııalyq aılyǵy is-sharalar josparyna sáıkes «Biz taza qalany qoldaımyz!» atty uranmen jalpyqalalyq senbilik ótýde. Bul sharaǵa QR Parlamentiniń depýtattary da atsalysýda.
Halyq qalaýlylary elordadaǵy Saraıshyq kóshesi boıynda aǵash egý jumystarymen aınalysty. Parlament Májilisinen atalǵan sharaǵa depýtattar, apparat qyzmetkerlerin qosa alǵanda barlyǵy 200-ge tarta adam qamtylyp otyr. Depýtattar belgilengen orynǵa 150-den astam aǵash kóshetterin, onyń ishinde pıramıda teregi men qaraǵash otyrǵyzdy. Májilis pen Senat depýtattary kógaldandyrý sharalaryn júrgizgen orynǵa arnaıy belgi de ornatylady.
«Astana qalasynda elordany kórkeıtý maqsatyndaǵy birqatar ujymdardyń ózderine belgilenip berilgen aýmaqtary bar. Olar sol jerdegi tazalyqty qadaǵalap, abattandyrý men kógaldandyrý jumystaryn júrgizip, únemi qamqorlyqqa alyp otyrady. Sol sekildi Parlamentke de naqty bir aýmaqty belgilep berse, onda tıisti jumystardy atqaryp, bos ýaqytymyzda otbasymyzben qoǵamdyq jumystarǵa aralassaq degen tilek bar», - deıdi depýtattar. «Bir tal kesseń, on tal ek» deıtin danalyq sóz bar. Halyq qalaýlylary jumyla kirisken bul shara jyldar óte kele kógalǵa oralǵan elordanyń kelbetin de qalyptastyrýǵa da úlken úles bolatyny sózsiz. Toqtala ketetin jaıt, jyl saıyn sáýir aıynda dástúrli túrde uıymdastyrylatyn senbilik barysynda aǵash egýden basqa, ruqsat etilmegen jerlerge tastalǵan qoqys úıindilerin qala syrtyna shyǵarý, qurylys nysandarynyń, mektepter, medıtsınalyq jáne basqa da memlekettik kásiporyndardyń alańdaryn, sondaı-aq gúl baqtary men saıabaqtardy, qalaǵa kireberis avtojoldardy qoqystan tazartý jáne kógaldandyrý jumystary júrgiziledi.
