Parlament depýtattary men apparatynyń qyzmetkerleri jalpy qalalyq senbilikke shyqty
STANA. Sáýirdiń 24-i. QazAqparat /Qanat Mámetqazyuly/ - Búgin sáýirdiń 24-inde QR Parlamenti Senaty men Májilisiniń depýtattary, qos palata apparatynyń qyzmetkerleri «Biz - taza qala úshin» atty uranmen ótip jatqan jalpy qalalyq senbilikke qatysty. Atalǵan shara elordany kógaldandyrý, sanıtarlyq tazalaý jáne abattandyrý boıynsha bekitilgen ekologııalyq aılyǵynyń is-sharalar josparyna sáıkes ótýde, dep habarlaıdy QazAqparat tilshisi.
Halyq qalaýlylary elordadaǵy Ana men bala Ulttyq ǵylymı ortalyǵy ǵımaraty mańynda aǵash egý jumystarymen aınalysty. Sharaǵa qatysqan qos Palata Tóraǵalary, depýtattar, apparat qyzmetkerleri belgilengen orynǵa barlyǵy 400-ge tarta aǵash kóshetterin otyrǵyzdy. Parlament depýtattary men qyzmetkerleri jumyla kirisken senbiliktiń nátıjesinde atalǵan oryn jyldar óte kele kógalǵa oranǵan elordanyń kelbetin qalyptastyrýǵa da úlken úles bolatyny sózsiz. «Qazaqstannyń Astanasy - bul elimizdiń kelbeti. Elordaǵa kelgen qonaqtar bas qalamyz arqyly búkil el kelbetimen tanysqandaı áser alatyny sózsiz. Sondyqtan da qala tazalyǵyna basa mán bergen mańyzdy. Bul rette osylaı uıymdastyrylatyn senbiliktiń de qosatyn úlesi kóp dep bilemin», dedi Májilis Tóraǵasy Oral Muhamedjanov.
Toqtala ketetin jaıt, sáýirdiń 10-y men mamyrdyń 10-y aralyǵyn qamtıtyn senbilik barysynda aǵash egýden basqa, ruqsat etilmegen jerlerge tastalǵan qoqys úıindilerin qala syrtyna shyǵarý, qurylys nysandarynyń, mektepter, medıtsınalyq jáne basqa da memlekettik organdardyń alańdaryn, sondaı-aq gúl baqtary men saıabaqtardy, qalaǵa kireberis avtojoldardy qoqystan tazartý jáne kógaldandyrý jumystary júrgiziledi.
Jalpyqalalyq senbiliktiń negizgi maqsaty - qoǵamnyń nazaryn qala kósheleriniń tazalyǵyn saqtap, ekologııalyq mádenıetti qalyptastyrýǵa tartý bolyp tabylady. Elorda kósheleri men aýlalarynyń kórkin jaqsartýǵa nıet bildirgen barlyq qala turǵyndary men mekemeler bul sharaǵa óz úlesterin qosýda.
