Parlament depýtattary Qurban aıtta dárigerlerge syı-sııapat jasady
NUR-SULTAN. Qazqparat - Qurban aıt – qaıyrymdylyq pen meıirimdiliktiń meıramy. Osyǵan oraı Parlament depýtattary Qazaqstan Musylmandary dinı basqarmasymen birlesip, birqatar ıgi bastamany qolǵa aldy.
Bul týraly QR Parlamenti Senatynyń tóraǵasy Máýlen Áshimbaev óziniń Facebook -tegi paraqshasynda jazdy, dep habarlaıdy QazAqparat.
«Sonyń aıasynda búgin elordamyzdaǵy «Green TAL Food» áleýmettik dámhanasyna arnaıy bardym. Bul jerde taǵdyrdyń túrli synaǵyna tap bolǵan jandar jumys isteıdi. Dámhana qyzmetkerlerin aıt merekesimen quttyqtap, olarǵa qurbandyqtyń eti salynǵan azyq-túlik qorjynyn tartý ettik. ⠀
Jalpy, sońǵy jyldary elimizde áleýmettik kásipkerlik jandanyp kele jatqanyn baıqaýǵa bolady. Kásiptiń bul túri Memleket basshysynyń da basty nazarynda. Bıylǵy aqpanda Prezıdentimiz áleýmettik kásipkerlermen kezdesip, mundaı ıgilikti istiń qoǵam úshin mańyzy zor ekenin aıtty. Sondyqtan aldaǵy ýaqytta osy baǵytta tyń bastamalar qolǵa alynady dep senemiz. ⠀
Qurban aıt qarsańynda depýtattardyń bastamasymen medıtsına qyzmetkerlerin qoldaýǵa arnalǵan aktsııa da uıymdastyryldy. Soǵan oraı búgin Senat apparatynyń qyzmetkerleri indetpen kúrestiń aldyńǵy shebinde júrgen dárigerdiń úıine baryp, syı-sııapattar tabys etti.
Osylaısha, depýtattarymyz bıylǵy Qurban aıtty muqtaj jandarǵa, pandemııa kezinde óz isine adaldyq tanytqan medıtsına qyzmetkerlerine qoldaý kórsetý arqyly atap ótýde. Árdaıym osylaı bir-birimizge jaqsylyq jasap, qol ushyn sozsaq, kez kelgen synnan súrinbeı ótetinimizge kúmán joq. Sondyqtan yrys-yntymaǵymyzdan ajyramaıyq.⠀⠀
Barshańyzdy qasıetti merekemen quttyqtaı otyryp, nıetterińiz qabyl bolsyn dep tileımin. Aıt múbárak bolsyn!»,-dep jazdy Senat tóraǵasy.
