Parlament depýtattary elordany gazdandyrý jumystarymen tanysty
NUR-SULTAN. QazAqparat - QR Parlamentiniń depýtattary elordada gaz taratý jelileriniń qurylys jumystarymen tanysty, dep habarlaıdy QazAqparat qala ákimdigine silteme jasap.
Elordany gazdandyrý 3 kezeńnen turady. Qazirgi tańda qubyrlardy tóseý jáne gaz rettegish pýnktterdi daıyndaý jumystary júrgizilip jatyr. Jyl sońyna deıin JEO-1, 3, Kóktal-1, 2 jáne Agroqalashyq eldi mekenderinde gaz taratý qubyrlarynyń qurylysyn aıaqtaý josparlanyp otyr.
Aıta keteıik, gaz qubyry Qazaqstannyń Tuńǵysh Prezıdenti - Elbasy Nursultan Nazarbaevtyń tapsyrmasy boıynsha salynyp jatyr.
«Elordany odan ári damytý jónindegi keńeste Prezıdent Qasym-Jomart Kemeluly Toqaev qalany gazdandyrý protsesin baqylaýǵa alýdy tapsyrdy. Úlken jumys júrgizildi. Jeleznodorojnyı, Promyshlennyı, Ońtústik-Shyǵys eldi mekenderinde gaz taratý jelileriniń qurylysy bastaldy. Bul úılerdi kelesi jylytý maýsymy bastalǵanǵa deıin gazǵa qosýdy josparlap otyrmyz», - dedi elorda ákimi Altaı Kólginov.
Jobany ázirleýshiler habarlaǵandaı, gaz taratý jelileri kóshe jelisi arqyly ótkiziledi, turǵyndar gazǵa tikeleı qosylady. Ákimdik turǵyndar úshin tegin negizde eseptegishter qarastyrdy. Ekinshi kezeń - Mıchýrıno, Internatsıonalnyı, Kúıgenjar (1-2), Telman (3), Prıgorodnyı, Garden Village, Family Village eldimekenderi, al úshinshi kezeńde - Ilınka (1-2), Shubar (3), Óndiris (4) eldimekenderi gazdandyrylady. Іske asyrý merzimi -2020-2023 jyldar. Bul joba qaladaǵy zııandy qaldyqtardy 6 esege, qatty zattardy 40 myń tonnaǵa deıin azaıtýǵa múmkindik beredi.
