Parlament depýtattaryna kózdelgen jaza túrleri máslıhattar depýtattaryna da qoldanylýy múmkin

ASTANA. KAZINFORM – Parlament depýtattaryna kózdelgen jaza túrlerin máslıhattar depýtattaryna da qoldaný úshin zańnamaǵa túzetý engizilýi múmkin. Bul jaıynda Senat depýtattaryna Premer-Mınıstr Oljas Bektenovtiń jaýabynda aıtylǵan.

«Depýtattyń ádep kodeksin ázirleý qosymsha zerdeleýdi jáne taldaýdy talap etedi. Sonymen qatar Úkimet jergilikti ózin-ózi basqarý salasyndaǵy zańnamany jetildirý aıasynda óz mindetterin oryndamaǵany jáne tıisinshe oryndamaǵany úshin máslıhattar depýtattarynyń, sondaı-aq turaqty negizde jumys isteıtin máslıhattar depýtattarynyń jaýapkershiligin kúsheıtý maqsatynda Qazaqstan Respýblıkasy Parlamentiniń depýtattaryna qoldanylatyn jazaǵa uqsas jazanyń qosymsha túrlerin kózdeıtin túzetýler usynady», - dedi Úkimet basshysy jaýabynda.

Aıta keteıik, Qazaqstan Respýblıkasynyń Parlamenti jáne onyń depýtattarynyń mártebesi týraly» Konstıtýtsııalyq zańmen, Parlamenttiń jáne palatanyń reglamentterimen belgilengen depýtattyq ádep qaǵıdalaryn buzǵan jaǵdaıda palata tóraǵasynyń sheshimimen depýtatqa mynadaı jazalaý sharalary qoldanylýy múmkin: 

1. parlamenttik betke basý; 
2. kópshilik aldynda keshirim suraýǵa májbúrleý;
3. Palatalardyń birlesken nemese bólek jalpy otyrysynyń birinde sózden aıyrý; 
4. Palatalardyń úsh birdeı birlesken nemese bólek jalpy otyrysynda sózden aıyrý; 
5. Palatalardyń birlesken nemese bólek jalpy otyrystarynyń birinde otyrys zalynan shyǵaryp jiberý; 
6. Palatalardyń úsh birdeı birlesken nemese bólek jalpy otyrysynda otyrys zalynan shyǵaryp jiberý;
7. bir kúndik jalaqysynan aıyrý. 

Depýtatqa qoldanylatyn atalǵan jazalaý sharalarynyń bári palata tóraǵasynyń ókimimen rásimdeledi.