Parlament depýtattary kanıkýlǵa ketti

ASTANA. KAZINFORM — Búgin Parlament palatalarynyń birlesken otyrysy ótip, onda segizinshi saılanǵan Parlamenttiń úshinshi sessııasy resmı túrde jabyldy.

Atap aıtqanda, depýtattar bıylǵy 1 qyrkúıekke deıin parlamenttik kanıkýl dep jarııalanatyny týraly arnaıy qaýly qabyldady.

- Búgin segizinshi saılaǵan Parlamenttiń úshinshi sessııasynyń jumysyn aıaqtaǵaly otyrmyz. Biz óz ókilettigimizdiń týra bel ortasyna keldik. Іs júzinde bul - birlese atqaryp jatqan jumysymyzdyń mkańyzdy kezeńi, mejeli belesi. Shyn máninde, qazirgi saılanym Memleket basshysynyń «Kúshti Prezıdent – yqpaldy Parlament – esep beretin Úkimet» formýlasyn júıeli de, dáıekti túrde júzege asyryp otyrǵan Parlament deýge bolady. Osy jyldary depýtattar udaıy Prezıdent reformalarynyń alǵy shebinen kórindi, - dedi Májilis tóraǵasy Erlan Qoshanov.

Onyń aıtýynsha, Parlament depýtattary árdaıym Memleket basshysynyń jan-jaqty oılastyrylǵan halyqtyń talap-tilegine, eldiń múddesine negizdelgen strategııasyn basshylyqqa alyp keledi. Bul ustanym baǵyt-baǵdarymyzdy aıqyndap, kúsh-qýatymyzdy bir arnaǵa jumyldyrýǵa jol ashty.

- Parlamenttiń kúndelikti jumysy, eń áýeli, osy reformalar mazmunyn odan ári baıytyp, naqty ispen qoldaýǵa baǵyttalǵan. Sessııa bastalarda Memleket basshysy óz Joldaýynda alǵa qoıǵan basty mindetteri bizdiń jumysqa serpin berip, qarqyn qosty. Ulttyq quryltaıda aıtylǵan strategııalyq ıdeıalar Parlament nazaryn qoǵamnyń eń ózekti máselelerine aýdardy. Prezıdenttiń Saılaýaldy baǵdarlamasy aıasyndaǵy zańnamalyq bastamalardyń bárin derlik depýtattyq korpýs osy sessııada iske asyrdy. Úshinshi sessııa barysynda Parlament palatalarynyń 3 birlesken otyrysy, Senat pen Májilistiń 39 jalpy otyrysy ótti. Qos palatanyń qaraýynda 158 zań jobasy boldy, onyń ishinde 89 zań qabyldandy. Sessııa barysynda biz áleýmettik saıasat pen azamattarymyzdyń múddesi myzǵymas basymdyq ekenin aıqyn kórsettik, - dedi Májilis tórǵasy.

Osy oraıda ol bul qadamdar elimizdiń negizgi qarjy qujatynda – úsh jyldyq bıýdjette kórinis tapqanyn atap ótti. Atap aıtqanda, onyń shyǵys bóliginiń shamamen 40 paıyzy áleýmettik máselelerdi sheshýge baǵyttalǵan. Bilim berý, densaýlyq saqtaý salalary men áleýmettik tólemderge basa mán berildi.

- Bıyldyń basynan bazalyq zeınetaqy 6,5 paıyz, sabaqtas zeınetaqy 8,5 paıyz ósti. Áleýmettik tólemder kólimi de, ony alýshylar sany da artty. Qyrkúıek aıynan bastap stıpendııa mólsherin taǵy da kóterý josparlanǵan. Keıingi 5 jylda stıpendııa eki ese derlik óskenin atap ótken jón. Oǵan qosa, ǵylymı ataq úshin de ústemeaqy qarastyryldy. Sonymen qatar, halyqty sapaly sýmen qamtamasyz etýge, aýyldy qoldaýǵa qosymsha qarajat bólindi. Atalǵan sharanyń bári azamattarymyzdyń turmysyn jaqsartýǵa, óńirlerdi damytý máselesin sheshýge múmkindik beredi, - dedi Erlan Qoshanov.

Budan buryn habarlanǵandaı, 25 maýsymda Májilis tóraǵasy Erlan Qoshanov VIII saılanǵan QR Parlamentiniń úshinshi sessııasyndaǵy palatanyń jumysyn qorytyndylady. 

Sonymen qatar, 26 maýsym kúni jalpy otyrysta Senat tóraǵasy Máýlen Áshimbaev úshinshi sessııada palata 89 zańdy qaraǵanyn aıtty.