Parlament depýtaty ár apta saıyn tazalyq kúnin ótkizýdi usyndy
ASTANA. KAZINFORM — Májilis depýtaty Dáýlet Muqaev ár beısenbini - «Taza beısenbi» atty halyqtyq tazalyq kúnine aınaldyrýǵa usyndy.
«Jolda kóp júremin. Keıbir pysyqaılar kólikte kele jatyp terezesinen bos bótelkelerin, qoqys qaldyqtaryn, temeki tuqylyn eshbir alańdamaı laqtyra salady. Qoǵamda áli de azamattarymyzdyń qaldyqtardy arnaıy qoqys tastaıtyn oryndarǵa salý mádenıeti qalyptaspaı otyrǵany jasyryn emes. Máselen, plastık, áınek jáne polıetılen paketterdiń shirýi 1000 jylǵa deıin sozylady. Munyń Jer anamyzǵa, adamzat balasyna, keler urpaqqa tıgizer zalaly zor», - dedi D. Muqaev Úkimet basshysy Oljas Bektenovtiń atyna joldaǵan saýalynda.
Bul turǵyda ol damyǵan elderdegideı tazalyq mádenıetin qalyptastyratyn sharalardy qolǵa alý kerek ekenin aıtty.
«Onyń sheshimi – jalpy jurtty qorshaǵan ortany tazalaýǵa jappaı jumyldyrý, kúndelikti tazalyqty ómir saltymyzǵa aınaldyrý qajet. Aptanyń taǵy bir kúnin, naqtylap aıtsaq, ár beısenbini - «Taza beısenbi» atty shynaıy halyqtyq sharaǵa aınaldyraıyq. Adamdardy májbúrlep emes, óz yqylasymen turǵan jerine degen janashyrlyqpen atsalysýyna jaǵdaı jasaıyq. Biz sol kezde ǵana kún-tún demeı, kúnniń ystyq-sýyǵyna qaramaı kósheni tazalap júrgen ata-apalarymyzdyń eńbegin baǵalaýdy úırenemiz. Ol úshin áleýmettik jelidegi mıllıondaǵan oqyrmany bar tanymal tulǵalardy, qoǵam belsendilerin, el turǵyndaryn osy ortaq iske birge atsalysýǵa shaqyramyn», - dedi depýtat.
