Parlament bıýlletenderge «barlyǵyna qarsymyn» baǵanyn bekitti
NUR-SULTAN. QazAqparat – Májilis pen máslıhat saılaýy kezinde saıası partııalardyń ótý shegi 7 paıyzdan 5 paıyzǵa deıin tómendeıdi. Osy oraıda senator Lázzát Súleımen bul normaǵa qatysty pikir bildirdi, dep habarlaıdy QazAqparat tilshisi.
Aıta keteıik, búgin Senattyń jalpy otyrysynda «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Zańy qabyldandy.
«Májilis pen máslıhat depýtattary saılaýda saıası partııalardyń ótý shegin 7 paıyzdan 5 paıyzǵa deıin tómendetý saıası básekelestikti odan ári damytýǵa baǵyttalyp otyr. Álemdik tájirıbede bul kórsetkish 1%-dan 10%-ǵa deıin. Kóptegen elderde proportsıonaldy júıe boıynsha saılaý shegi 5% deńgeıinde qalyptasty», - dedi L. Súleımen.
Onyń aıtýynsha, «barlyǵyna qarsy» degen baǵan Reseı Federatsııasynyń, Avstralııanyń, Ispanııanyń, Úndistannyń jáne birqatar eýropa elderiniń bıýlletenderinde bar.
«Osy baǵandy engizý arqyly biz tańdaý erkindigin qamtamasyz etemiz. Bul da mańyzdy norma», - dedi senator.
Engizilip otyrǵan jańashyldyqtar:
– azamattarǵa ózderiniń konstıtýtsııalyq quqyqtaryn tolyqqandy iske asyrýda belsendilikti arttyrýǵa;
– jergilikti memlekettik basqarý organdarynyń halyqtyń qajettilikterin jáne problemalaryn naqty sheshýge, ıaǵnı «Halyq únine qulaq asatyn» memleket tujyrymdamasyn tolyq kólemde iske asyrýǵa múmkindik beredi.
Budan buryn habarlanǵandaı, búgin Senat ákimderdi tikeleı halyqtyń saılaýyna múmkindik beretin zańdy qabyldady.
