Parlament bıýdjetke engizilgen túzetýlerdi qabyldady
Atap aıtqanda, usynylyp otyrǵan 2018 jylǵa arnalǵan respýblıkalyq bıýdjetti naqtylaý týraly zań jobasy Shymkent qalasy men Túrkistan oblysynyń ákimshilik mártebelerin ózgertý týraly Memleket basshysynyń Jarlyǵyn iske asyrý úshin ázirlendi.
Osyǵan baılanysty zań jobasynda oblystan respýblıkalyq bıýdjetke keri transfert aýdarý jáne olardy transferttermen Shymkent qalasyna qaıta jiberý jolymen oblystyń sýbventsııalar kólemin bólý kózdeledi.
«Tıisinshe respýblıkalyq bıýdjet parametrleri atalǵan bólýdi eskere otyryp qana ózgeredi. Osy oraıda túsimder 8 trln 772,3 mlrd teńgeni quraıdy, ol buryn naqtylanǵan jospardan 12,6 mlrd teńgege joǵary. Shyǵystar da 12,6 mlrd teńgege ulǵaıa otyryp, 9 trln 655,6 mlrd teńgeni qamtydy. Bıýdjet tapshylyǵy men munaıly emes tapshylyq ózgerissiz qalady», - dedi Qarjy mınıstri Álıhan Smaıylov.
Bıýdjettiń shyǵys bóliginiń ishki ózgeristeri úsh baǵyt boıynsha júzege asyrylady.
Birinshiden, Shymkent qalasy men Túrkistan oblysynyń ákimshilik mártebelerin ózgertý týraly Memleket basshysynyń tapsyrmalaryn iske asyrý eskerilgen. Oǵan qosymsha 29,7 mlrd teńge baǵyttaý usynylady. Ekinshiden, 83,9 mlrd teńge somasynda qosymsha qarjylandyrýy bar Elbasynyń jyl saıynǵy Qazaqstan halqyna Joldaýlarynda berilgen tapsyrmalaryn iske asyrý qarastyrylǵan.
«Úshinshiden, naqtylanǵan bıýdjet jobasynda qurylys salý merziminen ozyp ketken jobalar boıynsha qarjylandyrý, sondaı-aq buryn qabyldanǵan mindettemelerdi qamtamasyz etý kózdelgen.
Osylaısha, 9,8 mlrd teńge somasyndaǵy qosymsha qarajat bilim berý, ınjenerlik ınfraqurylym, turǵyn-úı salý, gazdandyrý nysandaryn salý boıynsha jalǵastyrylǵan jobalardy iske asyrýdy tezdetýge baǵyttalatyn bolady. 9,2 mlrd teńgeni áskerı qyzmetshilerdi turǵyn úımen qamtamasyz etýge baǵyttaý usynylady. «Petropavl aýyr mashına jasaý zaýyty» AQ men «S.M. Kırov atyndaǵy zaýyt» AQ-nyń óndiristik qýattaryn tehnologııalyq jańǵyrtýǵa 3,3 mlrd teńge josparlandy», - dep naqtylady mınıstr.
Óz kezeginde QR Ulttyq bankiniń tóraǵasy Danııar Aqıashev 2018-2020 jyldarǵa arnalǵan respýblıkalyq bıýdjettegi ózgeristerdiń parametrleri Ulttyq Bankpen kelisilgenine toqtala kele, aqsha-nesıe saıasaty men qarjy naryǵyndaǵy jaǵdaı týraly málimetterdi jarııalady.
«2018 jylǵy qańtar-qyrkúıek aılarda ınflıatsııa 3,3 paıyz boldy, bul ótken jyldyń uqsas kezeńinen tómen. Qyrkúıektegi jyldyq ınflıatsııa ótken jyldyń sońyndaǵy 7,1 paıyzben salystyrǵanda 6,1 paıyzǵa deıin tómendedi. Ulttyq banktiń baǵalaýy boıynsha bıylǵy jyly ınflıatsııa 5-7 paıyz maqsatty dálizde qalady, al 2019 jyly ol 4-6 paıyzdy quratyn jańa tómen maqsattyq dálizdiń joǵary shekarasynda qalyptasýy kerek», - dedi D. Aqyshev.
Bolashaqta ınflıatsııanyń ósýine jol bermeý úshin Ulttyq bank 15 qazanda bazalyq stavkany 9 paıyzdan 9,25 paıyzǵa deıin kóterý týraly sheshim qabyldady. Bazalyq stavkanyń jańa deńgeıi teńge aktıvterine suranysty arttyrady jáne qolaıly aqsha-nesıe jaǵdaılaryn saqtaýǵa múmkindik beredi.
