Parlament burynǵy sheneýniktiń qyzmettik mindetterin oryndaý kezeńinde tikeleı baqylaýynda bolǵan kompanııalarǵa jumysqa ornalasýyna tyıym salatyn zańdy qabyldady
ASTANA. 10 jeltoqsan. QazAqparat /Qanat Mámetqazyuly/ - Búgin QR Parlamenti Cenatynyń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik qyzmet jáne sybaılas jemqorlyqqa qarsy kúres máseleleri boıynsha ózgerister men tolyqtyrýlar engizý týraly» zańy eki oqylym boıynsha talqylanyp, qujat qabyldandy.
Endi Parlament qabyldaǵan zań Memleket basshysynyń qol qoıýyna jiberiledi.
Zań QR Prezıdentiniń «Qazaqstan Respýblıkasynda qylmysqa jáne sybaılas jemqorlyqqa qarsy kúresti kúsheıtý jáne quqyq qorǵaý qyzmetin odan ári jetildirý jónindegi qosymsha sharalary týraly» Jarlyǵyn júzege asyrý úshin ázirlengen.
Qujat memlekettik qyzmet júıesinde memlekettik qyzmetshi jeke basynyń múddesi jáne qoǵam men memleket múddesi arasyndaǵy qaıshylyqtar týyndaýy múmkin «múddeler qaqtyǵysy» uǵymyn zańnamalyq deńgeıde anyqtaıdy. Bul rette memlekettik qyzmetshiniń memlekettik qyzmetten bosatylǵannan keıin belgili bir kezeń ishinde óziniń mindetterin atqarý barysynda tikeleı baqylaýynda nemese quzyretine sáıkes tikeleı baılanysty bolǵan kommertsııalyq uıymdarǵa aýysýyna tyıym salýdy belgileýge baǵyttalǵan.
Sondaı-aq memlekettik qyzmetshiler úshin belgilengen shekteýlerdi memlekettik uıymdarda jáne memlekettiń qatysý úlesi bar uıymdarda basqarý fýnktsııalaryn oryndaıtyn adamdarǵa da qoldaný tapsyrylǵan. Bundaı tyıym salýlar boıynsha, ıaǵnı azamattarǵa memlekettik qyzmetten bosatylǵannan keıin kommertsııalyq uıymdarda jumysqa ornalasý tyıym salynatyn normany Eńbek kodeksine engizý kózdeledi. Memlekettik qyzmetshiler úshin belgilengen shekteýler memlekettik uıymdarda jáne memlekettiń qatysý úlesi bar uıymdarda basqarý fýnktsııasyn oryndaıtyn adamdarǵa qoldanylady. Tıisti normalar «Sybaılas jemqorlyqqa qarsy kúres týraly» zańyna engiziledi.
