Parlament bıylǵy sessııa barysynda 104 zań qabyldady - Q. Toqaev
ASTANA. QazAqparat - Parlament bıylǵy sessııa barysynda 104 zań qabyldady. Búgin Senat aǵymdaǵy sessııasynyń sońǵy otyrysyn ótkizdi. Osyǵan baılanysty sessııa barysynda atqarylǵan jumystardy qorytyndylaǵan palata spıkeri Qasym-Jomart Toqaev osylaı málimdedi.
«Bıylǵy sessııada Senat Májilispen, Úkimetpen tyǵyz baılanysta jumys isteı otyryp, Elbasynyń tapsyrmasynan týyndaǵan keshendi sharalardy zańnamalyq turǵydan qamtamasyz etýge baǵyttalǵan naqty mindetterdi júzege asyrdy. Parlament qabyldaǵan 104 zań tutastaı alǵanda damyǵan 30 eldiń qataryna qosylý jónindegi strategııalyq mindetti tabysty júzege asyrýymyzdyń berik quqyqtyq negizi bolary anyq», - dedi spıker Q. Toqaev.
Onyń aıtýynsha, sessııa barysynda kásipkerlikti damytýdy yntalandyrýdyń, qarjy sektorynyń áleýetin arttyrýdyń, ınvestıtsııalyq ahýaldy jaqsartýdyń jańasha zańnamalyq negizi qalanǵan. Biregeı ınvestıtsııalyq sharttar, eń tómengi salyqtar jáne ınvestorlar men memlekettiń ózara qarym-qatynastarynyń turaqtylyǵy da zańnamalyq turǵydan bekitilgen.
«Parlament qabyrǵasynda basym baǵytta tereń talqylanyp, qabyldanǵan qujattar qatarynda Astanada ótetin «EKSPO-2017» halyqaralyq kórmesin uıymdastyrýǵa jáne bıznes pen memlekettiń tıimdi ózara yqpaldasýyn nyǵaıtýǵa baǵyttalǵan zańdar da bar. Qylmystyq zańnamalardy, kodeksterdiń jańa redaktsııalaryn talqylaý men qabyldaý boıynsha Parlamentte óte joǵary deńgeıde nátıjeli jumystar atqaryldy», - dedi Senat Tóraǵasy. Onyń aıtýynsha, depýtattyq saýaldar parlamenttik baqylaýdyń pármendi quraly bolyp tabylady. «Osy rette senatorlar sessııa barysynda áleýmettik-ekonomıkalyq mańyzy bar taqyryptar boıynsha 140-tan astam saýaldar jarııalap, qoǵamdy tolǵandyryp otyrǵan ózekti máselelerdiń ońtaıly sheshim tabýyna tikeleı úles qosty», - dedi spıker.
