Parlament «Bilim týraly» QR Zańyna ózgerister men tolyqtyrýlardy qabyldady
TANA. 28 qyrkúıek. QazAqparat. Búgin QR Parlamenti «Bilim týraly» QR Zańyna ózgerister men tolyqtyrýlar engizý týraly» Qazaqstan Respýblıkasy Zańynyń jobasyn maquldady, dep habarlaıdy BǴM baspasóz qyzmeti.
Zań jobasyna Qazaqstan Respýblıkasynyń damý strategııasy men Bilim berýdi damytýdyń memlekettik baǵdarlamasynyń negizgi erejeleri men 2011 jylǵy 28 qańtardaǵy Memleket basshysynyń halyqqa Joldaýynda aıtylǵan tapsyrmalaryn iske asyrýdy zańnamalyq qamtamasyz etýge qatysty ózgerister men tolyqtyrýlar engizildi.
Zań jobasy buryn qabyldanǵan «Ǵylym týraly», «Nazarbaev ýnıversıtetiniń mártebesi týraly», «Nazarbaev Zııatkerlik mektepteri» jáne «Nazarbaev Qory» týraly QR zańdaryna sáıkes keltirilgen.
Zańda qandaı jańalyqtar bar?
Birinshiden, 12 jyldyq oqytýǵa kóshýdi retteıtin, sondaı-aq «Beıindik mekteptiń» quqyqtyq mártebesin anyqtaıtyn ózgerister engizilgen.
Oqýlyqtardyń, oqý-ádistemelik keshender men quraldardyń sapasyna talaptar kúsheıtildi, olardy aprobatsııalaý men monıtorıngten ótkizý engizildi.
Ekinshiden, Zańǵa orta bilim sapasyn arttyrý maqsatynda «bilim sapasynyń vertıkalin» qalyptastyratyn ózgerister engizildi.
Úshinshiden, jańa memlekettik baǵdarlamada qarastyrylǵan pedagogterdiń mártebesin kóterý.
Bul úshin biliktilikti arttyrýdyń vaýcherlik-modýldik qarjylandyrý júıesi zańnamalyq turǵyda engiziledi.
Sondaı-aq lıtsenzııalanbaıtyn jeke pedagogıkalyq qyzmet týraly jańa bap qosyldy.
Tórtinshiden, memlekettik aralyq baqylaýdy alyp tastalady.
Aralyqbaqylaý qoıylǵan mindetterdi oryndap shyqty. Onyń ornyna oqýshylardyń oqý jetistikterin syrttaı baǵalaý (OJSB) júıesi engiziledi.
Besinshiden, orta, tehnıkalyq jáne kásiptik, joǵary oqý ornynan keıingi bilim berýdi janbasylyq qarjylandyrýǵa kóshirý zańnamalyq turǵyda qamtamasyz etilgen. Bul pedagogter eńbeginiń tıimdiligin kóterýge, bilim salasyndaǵy memlekettik-jeke áriptestikti damytýǵa múmkindik beredi.
Altynshydan, memlekettik bilim berý tapsyrysy arqyly medıtsınalyq jáne pedagogıkalyq mamandyqtar boıynsha joǵary oqý oryndaryn bitirýshilerdi mindetti túrde jumysqa ornalastyrý qarastyrylǵan.
Bul shara - áleýmettik sala úshin óte mańyzdy.
Jetinshiden, joǵary oqý oryndarynyń jańa jikteýishi engizildi: Olar: ulttyq zertteý ýnıversıtetteri, ulttyq joǵary oqý oryndary, zertteý ýnıversıtetteri, ýnıversıtetter, akademııalar jáne ınstıtýttar.
Bul joǵary mekteptiń ǵylymı-bilim berý qyzmetiniń jalpy deńgeıin arttyrady.
Segizinshiden, Bolon jáne Týrın protsesteriniń negizgi prıntsıpterin iske asyrý úshin normatıvtik-quqyqtyq baza jasaý.
Joǵary oqý ornyndaǵy bilim alýshylar men professorlyq-oqytýshylyq quramnyń akademııalyq mobıldigi zań júzinde qamtamasyz etildi.
Oqý oryndaryn akkredıtteý júıesi ózgertiledi. Ol básekege qabiletti ortaǵa berilip, halyqaralyq úlgide júrgiziledi.
Bakalavrıat mamandyqtary «Bolashaq» baǵdarlamasynan alynyp tastaldy. Osyǵan baılanysty zań jobasy mamandardyń shetelde taǵylymdamadan ótý máselesin retteıdi.
Toǵyzynshydan, Tehnıkalyq jáne kásiptik bilim berý máseleleri boıynsha da kóp ózgerister bar.
Áleýmettik áriptestik jáne kooperatıvtik oqytý normalary engizildi. Olar - memleket, kásiporyn jáne oqý oryndarynyń korporatıvtik jaýapkershiligine negizdeledi.
Bul Elbasynyń tapsyrmasyna sáıkes tehnıkalyq jáne kásiptik bilimniń túbegeıli jańa modelin jasaý úshin óte mańyzdy.
Onynshydan, engizilgen ózgeristerge sáıkes Úkimettiń, bilim berý salasyndaǵy ýákiletti organnyń jáne jergilikti organdardyń arasyndaǵy ókilettik naqtylandy.
Jalpy aıtqanda osy jáne basqa da ózgerister men tolyqtyrýlar (200-den astam) halyqaralyq standarttarǵa sáıkes keltiretin bilimniń quqyqtyq bazasyn jetildirýge baǵyttalǵan.
