Parlament baılanys máselelerin qamtyǵan zańdy qabyldady
ASTANA. 10 jeltoqsan. QazAqparat /Qanat Mámetqazyuly/ - Búgin QR Parlamenti Cenatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine baılanys máseleleri boıynsha tolyqtyrýlar engizý týraly» zańyn eki oqylym boıynsha qarap shyǵyp,
qujatty qabyldady.
Atalǵan zań sandyq tele jáne radıo habarlaryn taratýdy damytýǵa jáne sandyq turǵydaǵy taratýǵa kóshý (2011 jylǵy 1 qańtar men 2015 jylǵy 31 jeltoqsan aralyǵynda) kezeńinde qazaqstandyq telekompanııalar men telearnalardy qoldaýǵa baǵyttalǵan. Bul rette Bıýdjet kodeksi men «Baılanys týraly» zańǵa tolyqtyrý engiziledi. Atap aıtqanda, otandyq teledıdar jáne radıoarnalardy jer serigi júıesi arqyly taratýdaǵy baılanys jáne aqparat salasy ýákiletti organdarynyń taratý jónindegi quzireti naqtylanady. Qujatqa Májilis depýtattary bastamashylyq jasaǵan bolatyn.
«Qazir «Habar» men «Qazaqstan» arnalary ǵana habar taratý boıynsha halyqtyń 95 paıyzyn qamtıdy. Halyqtyń basym bóligi sheteldik habarlardy qabyldaıtyn jerseriktik júıelerge umtylyp otyr. Bul rette sheteldik 452 teleradıo arnalary 152 kabeldik jáne 6 jerseriktik operatorlardy paıdalanyp, jurt arasynda óz saıasatyn nasıhattap keledi. Sonyń saldarynan elimizdiń soltústigi reseılik, ońtústigi ózbek, batysy túrikmen, shyǵysy qytaı telearnalaryn kórýge májbúr. Sondyqtan bul zań el halqynyń telearnalardyń uqsas formatynda tegin sapaly teledabyldy qabyldaý boıynsha konstıtýtsııalyq quqyqtaryn qamtamasyz etýge baǵyttalady jáne otandyq aqparattyq keńistikti qorǵaýǵa yqpal etedi», - deıdi Senat aldynda baıandama jasaǵan Májilis depýtaty Maıra Aısına. Onyń aıtýynsha, zań qabyldansa, respýblıka halqy teleradıohabarlar taratý kepildigi boıynsha tegin kóparnaly radıohabarlarymen 100 paıyzǵa qamtylýy múmkin.
Zań Memleket basshysynyń qol qoıýyna jiberiledi.
