Parlament Baıqońyr qalasynyń, Tóretam jáne Aqaı kentteriniń turǵyndaryna medıtsınalyq qyzmet kórsetý tártibi týraly kelisimdi qabyldady
amyrdyń 13-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Reseı Federatsııasynyń «Baıqońyr» keshenin jalǵa alý jaǵdaıynda Baıqońyr ǵarysh aılaǵynyń personalyna, Baıqońyr qalasynyń, Tóretam jáne Aqaı kentteriniń turǵyndaryna medıtsınalyq qyzmet kórsetý tártibi týraly kelisimdi ratıfıkatsııalaý týraly» zańy qabyldandy,
dep habarlaıdy QazAqparat.
Atalǵan zańnyń maqsaty «Baıqońyr» ǵarysh aılaǵynyń personalyna, Baıqońyr qalasynyń, Tóretam jáne Aqaı kentteriniń turǵyndaryna medıtsınalyq kómek kórsetý tártibin jetildirýdi kózdeıtin osy Kelisimdi ratıfıkatsııalaý bolyp tabylady. Atap aıtqanda, ǵarysh aılaǵynyń personalyna jáne Baıqońyr qalasynyń turǵyndaryna medıtsınalyq kómek kórsetýdi Reseıdiń densaýlyq saqtaý uıymdary, al Tóretam jáne Aqaı kentteriniń turǵyndaryna - Qazaqstannyń densaýlyq saqtaý uıymdary júzege asyratyn bolady.
Qujat boıynsha baıandama jasaǵan QR Densaýlyq saqtaý mınıstri Jaqsylyq Dosqalıevtyń aıtýynsha, búgingi kúni Baıqońyr qalasynda 68 myń 811 adam turatyn bolsa, ondaǵy Qazaqstan azamattarynyń sany 39 myń 72 adamdy qurap otyr. Al Tóretam kentinde 10 myń 57, Aqaıda 3 myń 347 adam turyp jatyr.
«Kelisimge sáıkes, Qazaqstan azamattaryna medıtsınalyq qyzmet kórsetý Reseı densaýlyq saqtaý uıymdarynda Qazaqstan tarapynyń qarajaty esebinen júrgiziledi. Kelisimniń kúshine enýi RF medıtsınalyq uıymdarynyń QR azamattaryna medıtsınalyq qyzmetter kórsetý bóliginde medıtsınalyq kómek kórsetý máselelerin sheshýge septigin tıgizedi», dedi mınıstr.
Parlament qabyldaǵan zań Elbasynyń qol qoıýyna jiberiledi.
