Parlament balalardy sheteldik asyrap alýǵa qatysty yntymaqtastyq týraly konventsııany qabyldady
ASTANA. Aqpannyń 25-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Balalardy qorǵaý jáne balany sheteldik asyrap alýǵa qatysty yntymaqtastyq týraly konventsııany ratıfıkatsııalaý týraly» zańdy qabyldady,
dep habarlaıdy QazAqparat.
Atalǵan konventsııaǵa 1993 jylǵy mamyrdyń 29-ynda Gaagada qol qoıylǵan jáne BUU-nyń Bala quqyqtary týraly konventsııasy, Áleýmettik jáne quqyqtyq qaǵıdattary týraly BUU deklaratsııasy, BUU Bas Assambleıanyń qarary negizinde qabyldanǵan. Qazaqstannyń Konventsııaǵa qosylýy halyqaralyq bala asyrap alý, balalardyń sheteldik asyrap alý úshin berilýin quqyqtyq qorǵaý máselelerin retteýde basqa da memlekettermen kúsh-jigerdi biriktigýge yqpal etetin bolady.
«Atalǵan zań sheteldik azamattar asyrap alǵan jetim balalardyń quqyqtary men múddelerin qorǵaý máseleleri boıynsha memleketterdiń ózara árekettesýleriniń jalpy erejelerin aıqyndaıdy. Qujatty qabyldaý qajettigi túrli sebepterden týyndaýda. Birinshiden, azamattyq qoǵamnyń elimiz aýmaǵynan tysqary jerlerde turatyn, sheteldik azamattar asyrap alǵan qazaqstandyq balalardyń taǵdyryna alańdaýshylyq bildirý kórinis tabady. Ekinshiden, Qazaqstannyń bala quqyqtaryn qamtamasyz etýi boıynsha BUU Bala quqyqtary jónindegi komıtetiniń nusqaýlaryna sáıkes qabyldanǵan mindettemeleri oryndaýy shart. Jalpy, Gaaga konventsııasyn ratıfıkatsııalaý arqyly biz sheteldik azamattar asyrap alǵan balalardyń quqyqtaryn qorǵaý máselelerinde anaǵurlym keń ókilettikke ıe bolamyz. Konventsııa bala qabyldaýshy memleketterge jaýapkershilik júkteıdi. Qujatqa konventsııaǵa qol qoıǵan jáne ony ratıfıkatsııalaǵan basqa memleketterdegi balalardyń taǵdyryn qadaǵalap baqylaýǵa quqyq beredi», dedi zań jóninde baıandaǵan Bilim jáne ǵylym mınıstri Janseıit Túımebaev.
Onyń aıtýynsha, Gaaga konventsııasyna sáıkes bala asyrap alýdaǵy basymdyq óz ultynyń balasyn asyrap alýǵa múmkindik bolmasa jáne bala asyraýǵa berip otyrǵan memlekettiń óz azamattaryna tárbıege berýi múmkin bolmaǵan jaǵdaıda ǵana sheteldik bala asyrap alýǵa jol beriledi. Bul norma qazaqstandyq zańnamada da qarastyrylǵan. Sonymen birge, konventsııa asyrap alatyn balanyń múddesin qorǵaýdy qamtamsyz etý, balalardy urlaýdy, satýdy, olardy saýdaǵa salýdy bolǵyzbaý maqsatynda memleketter arasynda yntymaqtastyqty damytýǵa járdemdesýge arnalǵan. Qujatta, sondaı-aq balany qorǵaý úshin qajeti sharalar aıqyndalǵan. Eger balany asyrap alý onyń múddelerine saı kelmese, ýaqytsha nemese balama qorǵanshylyq uıymdastyrylady, sondaı-aq bala shyqqan eline qaıtarylady.
