Parlament Azııa damý bankinen 125 mln. dollar qaryz alatyn kelisimdi qabyldady
ASTANA. 31 qazan. QazAqparat - Búgin spıker Qasym-Jomart Toqaevtyń tóraǵalyǵymen ótken Parlament Senatynyń jalpy otyrysynda palata depýtattary «Qazaqstan Respýblıkasy men Azııa Damý Banki arasyndaǵy Qaryz týraly kelisimdi ratıfıkatsııalaý týraly» QR Zańyn qabyldady.
Kelisim Azııa Damý Bankiniń Qazaqstanǵa «Batys Eýropa-Batys Qytaı» dálizi sheńberinde «Shymkent-Tashkent» jol ýchaskesin damytý úshin qaryz berýdi kózdeıdi.
Kelisimge sáıkes, 125 mln. dollar somasyndaǵy qaryz Qazaqstanǵa tórt jyldyq jeńildikti qosa alǵanda 16 jylǵa berilip otyr. Bul rette QR Úkimetiniń birlesip qarjylandyrylýy 22 mln dollardan aspaıdy. Bul rette respýblıkalyq bıýdjet qarajaty qurylys jumystaryn birlesip qarjylandyrýǵa, sonymen qatar, salyqtardy tóleýge jumsalatyn bolady.
Jalpy, Azııa Damý Banki qaryzy «Shymkent - Tashkent» joly ýchaskesi sheńberinde 705 shaqyrym jáne 742 shaqyrym arasyndaǵy uzyndyǵy 36,7 shaqyrym jol ýchaskesin qaıta jóndeýge jumsalady. Jobany júzege asyrý elimizdiń kóliktik áleýetin damytýdy qamtamasyz etip, halyqaralyq dálizdiń qazaqstandyq bóligi boıynsha qozǵalys qarqynyn aıtarlyqtaı arttyrady. Bul óz kezeginde tranzıttik júkterdiń júk aınalymyn ulǵaıtýǵa yqpal etedi jáne barlyq deńgeıdegi bıýdjetterdiń kiristerin ulǵaıtýǵa múmkindik beredi. Joba 2015 jylǵy 31 jeltoqsanda aıaqtalady dep kútiledi.
Parlament qabyldaǵan zań Memleket basshysynyń qol qoıýyna joldanady.
