Parlament Azamattyq protsestik kodeksti qabyldady
ASTANA. QazAqparat - Búgin Parlament Májilisiniń jalpy otyrysynda palata depýtattary Qazaqstan Respýblıkasy Azamattyq protsestik kodeksiniń jobasyna Senat engizgen ózgeristerdi qabyldady. Aıta keteıik, kodeks jobasy buǵan deıin Senatta úsh oqylymda talqylanyp, keıinnen qujatqa birqatar ózgerister engizilgendikten Májiliske qaıtarylǵan bolatyn.
Jańa redaktsııadaǵy kodeks Qazaqstannyń quqyqtyq saıasat tujyrymdamasyn iske asyrý maqsatynda jáne Memleket basshysynyń sýdıalardyń VI sezinde qoıǵan mindetterin oryndaý úshin ázirlengen bolatyn. Tutastaı alǵanda Azamattyq protsestik kodeks jobasy azamattyq-protsestik zańnamanyń jedeldigin arttyrýdy, sot isin júrgizýde bitimdestirý rásimderin belsendi qoldaný úshin ony jańǵyrtý arqyly jeke jáne zańdy tulǵalardyń konstıtýtsııalyq quqyqtary men bostandyqtaryn sotta tıimdi qorǵaýdy qamtamasyz etýdi kózdeıdi. Sonymen qatar, qujattyń erejeleri azamattardyń, memlekettiń jáne zańdy tulǵalardyń buzylǵan nemese daýlanyp otyrǵan quqyqtaryn, bostandyqtaryn jáne zańdy múddelerin qorǵaýdy qarastyrady. Ondaı múddelerdi qalpyna keltirý týraly azamattyq sot isin júrgizý talaptaryn oryndaýǵa, zańdylyqty saqtaýǵa, qoǵamnyń zań men sotqa kadir-qurmetpen qaraýyn qalyptastyrýǵa baǵyttalady.
Toqtala ketetin jaıt, senatorlar Májilis maquldaǵan kodeks jobasyna negizinen Memleket basshysynyń «100 naqty qadam» Ult josparyn júzege asyrýǵa baılanysty ózgerister engizdi. Atap aıtqanda, Senat kodeks jobasyna Ult josparynyń 16-shy qadamyndaǵy úsh deńgeıli júıe qurý jaǵdaıynda azamattyq isterdi qaraýdyń protsestik tártibine kóshý, sonymen birge, 20-synshy qadamdaǵy barlyq sot protsesterin aýdıo, beıne taspaǵa mindetti túrde jazýdy engizýge baılanysty tolyqtyrýlar engizdi.
Májilis depýtattary Senat engizgen ózgeristerge kelisim berip, qujatty qabyldaý týraly sheshim qabyldady. Endi qujat Memleket basshysynyń qol qoıýyna joldanady.
