Parlament Azamattyq kodekske engizilgen ózgeristerdi qabyldady
ANA. 10 naýryz. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Qazaqstan Respýblıkasynyń Azamattyq kodeksine (Erekshe bólim) ózgerister men tolyqtyrýlar engizý týraly» zań eki oqylymda qabyldandy.
Atalǵan zańnyń maqsaty - qyzmetkerdiń densaýlyǵyna keltirilgen zııandy óteý tártibin reglamentteıtin azamattyq zańnamany jetildirý bolyp tabylady. Qujatty qabyldaý azamattardyń aýyrǵan, múgedek bolǵan jaǵdaıda áleýmettik qamtamasyz etýge degen konstıtýtsııalyq kepildikterin iske asyrýǵa baǵyttalǵan quqyqtyq bazany jetildiredi. Sonymen qatar qabyldanǵan zań boıynsha óndiriste zardap shekken adamdarǵa tólenetin járdemaqy máselelerin ulǵaıtýǵa múmkindigin beredi.
Atap aıtqanda, QR Azamattyq kodeksine keltirilgen zııan úshin jaýapty dep tanylǵan jumys berýshi kásibi men biliktiligi dál sondaı qyzmetkerdiń ortasha jalaqysynyń mólsherin ulǵaıtqan kezde joǵaltqan tabysyn óteý somalaryn qaıta esepteý týraly norma qamtyldy. Budan bólek, bankrottyq saldarynan taratylǵan zańdy tulǵalardyń ómiri men densaýlyǵyna keltirilgen zııandy óteý jónindegi kapıtaldandyrylǵan tólemderdi alǵan qyzmetkerlerge jasyn shektemeı memlekettiń aı saıynǵy tólemderin júzege asyrýy qarastyrylady. Densaýlyǵyna zııan keltirýine jáne zardap shegýshiniń qaıtys bolýyna baılanysty tutyný ındeksine proportsıonaldy túrde taǵaıyndalǵan, joǵaltqan tabysyn óteý somalaryn ındeksteý jónindegi normalardy belgileý bóliginde de ózgerister engizilgen.
Parlament qabyldaǵan zań Elbasynyń qol qoıýyna jiberiledi.
